Xabaringiz bor, «Navbahor» Osiyo Chempionlar Ligasi (OCHL) saralash bahsi doirasidan o‘rin olgan bahsda safarda Qatarning “Al-Vakra” klubiga qarshi maydonga tushadi.

An’anaga muvofiq, bo‘lajak raqibimiz to‘g‘risidagi ma’lumotlarni e’tiboringizga havola etamiz.

“Al-Vakra” mazkur nom bilan ataluvchi shahar sharafini himoya qiladi va jamoa 1959 yili tashkil topgan.

“Al-Vakra” o‘tgan mavsumlar davomida Qatar quyi ligasining 2 karra g‘olibi (1985, 2019 yillar), 2 karra Qatar chempioni (1998/1999 yillar mavsumi, 2000/2001 yillar mavsumi), Qatar shahzodasi kubogi sohibi (1999 yil) hamda finalchisi (1996 yil), shayx Yassim kubogining 4 karra sohibi (1989, 1991,1998, 2004 yillar) va finalchisi (2003 yil) hamda Qatar ligasi kubogi sohibi (2011 yil) hisoblanadi.

“Al-Vakra”ni shuningdek, “Yashil to‘lqin” deb ham atashadi.

Bo‘lajak raqibimiz o‘tgan mavsumda Qatar Yulduzlar Ligasida 12 jamoa orasida 4-o‘rinni egallab, OCHL “pley-off” yo‘llanmasini qo‘lga kiritgandi.

“Al-Vakra”ni 2018 yildan buyon ispaniyalik 61 yoshli mutaxassis Tintin Markes Lopes boshqarmoqda. Jamoa sardori esa jazoirlik 33 yoshli hujumchi Muhammad Benyattu.

Ayni paytda “Al-Vakra” tarkibida 7 nafar legioner to‘p tepmoqda. Bular: himoyachilar - Trent Lukas Seynsberi (Avstraliya, 31 yosh), Lukas Mishel Mendes (Braziliya, 33 yosh), yarim himoyachilar – Hamdi Fathi (Misr, 28 yosh), Asad Al Omar (Iordaniya, 20 yosh), Ayub Assal (Marokash, 21 yosh), hujumchilar – Muhammad Benyattu (Jazoir, 33 yosh) va Dala Jasintu (Angola, 27 yosh).

Bo‘lajak raqibimiz o‘z uy uchrashuvlarini o‘tgan mavsumdan boshlab, o‘tgan yili Qatarda bo‘lib o‘tgan JCH-2022 uchun qurilgan, o‘tgan yilgi mundialning guruh bahslari va 1/8 final doirasidagi bitta o‘yin o‘tkazilgan, 40000  (qirq ming) nafar muxlisga mo‘ljallangan “Al-janub” stadionida o‘tkazmoqda. Ertangi o‘yin ham mazkur o‘yingohda bo‘lib o‘tadi.

Eslatib o‘tamiz, “Al-Vakra” – “Navbahor” bellashuvi 22 avgust kuni Toshkent vaqti bilan soat 20:30 da start oladi.

“Navbahor” PFK matbuot xizmati