Хабарингиз бор, «Навбаҳор» Осиё Чемпионлар Лигаси (ОЧЛ) саралаш баҳси доирасидан ўрин олган баҳсда сафарда Қатарнинг “Ал-Вакра” клубига қарши майдонга тушади.

Анъанага мувофиқ, бўлажак рақибимиз тўғрисидаги маълумотларни эътиборингизга ҳавола этамиз.

“Ал-Вакра” мазкур ном билан аталувчи шаҳар шарафини ҳимоя қилади ва жамоа 1959 йили ташкил топган.

“Ал-Вакра” ўтган мавсумлар давомида Қатар қуйи лигасининг 2 карра ғолиби (1985, 2019 йиллар), 2 карра Қатар чемпиони (1998/1999 йиллар мавсуми, 2000/2001 йиллар мавсуми), Қатар шаҳзодаси кубоги соҳиби (1999 йил) ҳамда финалчиси (1996 йил), шайх Яссим кубогининг 4 карра соҳиби (1989, 1991,1998, 2004 йиллар) ва финалчиси (2003 йил) ҳамда Қатар лигаси кубоги соҳиби (2011 йил) ҳисобланади.

“Ал-Вакра”ни шунингдек, “Яшил тўлқин” деб ҳам аташади.

Бўлажак рақибимиз ўтган мавсумда Қатар Юлдузлар Лигасида 12 жамоа орасида 4-ўринни эгаллаб, ОЧЛ “плей-офф” йўлланмасини қўлга киритганди.

“Ал-Вакра”ни 2018 йилдан буён испаниялик 61 ёшли мутахассис Тинтин Маркес Лопес бошқармоқда. Жамоа сардори эса жазоирлик 33 ёшли ҳужумчи Муҳаммад Беньятту.

Айни пайтда “Ал-Вакра” таркибида 7 нафар легионер тўп тепмоқда. Булар: ҳимоячилар - Трент Лукас Сейнсбери (Австралия, 31 ёш), Лукас Мишел Мендес (Бразилия, 33 ёш), ярим ҳимоячилар – Ҳамди Фатҳи (Миср, 28 ёш), Асад Ал Омар (Иордания, 20 ёш), Аюб Ассал (Марокаш, 21 ёш), ҳужумчилар – Муҳаммад Беньятту (Жазоир, 33 ёш) ва Дала Жасинту (Ангола, 27 ёш).

Бўлажак рақибимиз ўз уй учрашувларини ўтган мавсумдан бошлаб, ўтган йили Қатарда бўлиб ўтган ЖЧ-2022 учун қурилган, ўтган йилги мундиалнинг гуруҳ баҳслари ва 1/8 финал доирасидаги битта ўйин ўтказилган, 40000  (қирқ минг) нафар мухлисга мўлжалланган “Ал-жануб” стадионида ўтказмоқда. Эртанги ўйин ҳам мазкур ўйингоҳда бўлиб ўтади.

Эслатиб ўтамиз, “Ал-Вакра” – “Навбаҳор” беллашуви 22 август куни Тошкент вақти билан соат 20:30 да старт олади.

“Навбаҳор” ПФК матбуот хизмати