Superliga 18-tur bahslarida hakamlar o‘zgarishi amalga oshirildi.
O‘zbekiston futbol hakamlari markazi Superliganing 18-turidan o‘rin olgan “Navbahor” – OKMK hamda “Neftchi” – “Andijon” bahslari bosh hakamlari o‘zgartirilganini ma’lum qiladi. Quyida ushbu o‘zgarishlarning batafsil sababini keltirib o‘tamiz.
“Navbahor” – OKMK uchrashuvi uchun bir necha kun oldin tayinlov olgan farg‘onalik hakam Olim To‘ychiboyev o‘yinga tayyorgarlik vaqtida jarohat olgani bois, ushbu muhim bahsni boshqara olmasligini ma’lum qildi. Shuningdek, uchrashuv VAR hakami bo‘lishi kutilgan Ilgiz Tantashev yuqorida ta’kidlaganimiz, 17-tur doirasidagi OKMK – “Neftchi” bahsida yo‘l qo‘ygan xatosi tufayli 18-turdagi bu uchrashuvdan chetlatildi (hozircha uning ishi Hakamlar qo‘mitasida ko‘rib chiqilmoqda va yakuniy jazo tayinlangani yo‘q). Shu tufayli, Olim To‘ychiboyev o‘rniga Temur To‘xtasinov ushbu uchrashuvda bosh hakamlik qilsa, VAR hakami vazifasini Ilgiz Tantashev o‘rniga esa Akobirxo‘ja Shukurullayev bajarib beradi.
“Neftchi” – “Andijon” bahsi Mustaqillik bayrami arafasida bo‘lib o‘tishi hamda televideniyening barcha ko‘chma televizion stansiyalari ushbu bayramni yoritish bilan band bo‘lishi sababli, bu bahsda VAR texnologiyasidan foydalanilmasligini ma’lum qilindi. Natijada, markaz ushbu o‘yinning darajasidan va keltirilgan sabablardan kelib chiqib, uchrashuvga FIFA referisini bosh hakam etib tayinlashga qaror qildi.
