«Everton»ga yangi kelgan Betu «Udineze» tarixiga kirdi.
25 yoshli futbolchi transferi uchun «irischilar» 25 million yevro to‘ladi. Bonus ballari faollashtirilganda tranzaksiyaning umumiy qiymati 30 million yevroga yetadi.
Shu tariqa, Transfermarkt ma’lumotlariga ko‘ra, Betu «Udineze»ning barcha davrlardagi ikkinchi eng qimmat transferi bo‘ldi.
Bu borada peshqadam 2021 yilda 35 million yevro evaziga «Atletiko Madrid»ga o‘tgan jahon chempioni Rodrigo de Paul bo‘lib qolmoqda.
«Udineze» tarkibida Betu jami 65 ta o‘yin o‘tkazib, raqiblar darvozasiga 22 bor zarba yo‘llagan. Portugaliyalik futbolchining «Everton» bilan shartnomasi 2027 yilning o‘rtalariga qadar tuzilgan.
