«Manchester Siti» 2015 yilning shu kunida «Volfsburg»dan belgiyalik futbolchi Kevin De Bryuyneni sotib olgan edi.
«Siti» o‘sha vaqtdan beri erishgan yutuqlarining markazida aynan Kevin bo‘ldi. «Siti» 54 million funt sterling atrofida summa to‘lagan va bu o‘sha paytdagi rekord darajadagi to‘lov edi. Premyer-ligaga KDB Germaniyada yilning eng yaxshi futbolchisi unvoni bilan kelgan. 24 yoshli futbolchi dastlab olti yillik shartnoma imzoladi.
Gentning Drongen tumanida tug‘ilgan De Bryuyne o‘zining professional faoliyatini «Genk»da boshlagan va 2010-11 yillarda Belgiya chempioni bo‘lgan, «Chelsi» 2012 yil yanvar oyida uning xizmatlariga 6,7 million funt sterling sarmoya kiritgan. So‘ng u «Verder Bremen»ga ijaraga berilgan.
Yarim himoyachi nihoyat 2013 yil avgust oyida Premyer-ligada «Xall» ustidan qozonilgan g‘alabada (2:0) «ko‘klar» safida debyut qildi va Oskarning goliga assistentlik qildi. Biroq, bu klub uchun u to‘qqizta o‘yin o‘tkazdi va keyingi yilning yanvar oyida «Volfsburg»ga sotildi. Bundesligaga 18 million funt sterlingga ketishidan oldin «Chelsi»ning o‘sha paytdagi bosh murabbiyi Joze Mourinyo shunday degan edi: «Biz bilamizki, Kevin «Chelsi»dagi qiyin hayotga moslasha olmadi».
Agar ingliz futboli belgiyalik uchun katta sinov bo‘lgan bo‘lsa, u endi Germaniyada o‘z yo‘lini topdi va keyinchalik «Etihad» stadionida eng istiqbolli iste’dodlardan biri sifatida Premyer-ligaga qaytdi. O‘shanda u shunday degan edi: «Men faqat g‘alaba qozonishni xohlayman. «Volfsburg»da ikkita kubokni qo‘lga kiritdim va shunchaki g‘alaba qozonishda davom etishni xohlayman va o‘ylaymanki, ko‘plab sifatli o‘yinchilarga ega jamoa bilan unvonlarni yutish uchun yaxshi imkoniyat bor», – degandi KDB. Bu kamtarlik uni keyingi faoliyatida ham tark etmadi.
2015 yil 12 sentyabrda «Kristal Pelas»ga qarshi bahs (1:0) zaxiradan maydonga tushgan Kevin uchun debyut edi. De Bryuyne bir marta Chempionlar Ligasi, besh marta Premyer-liga chempionligi, ikki marta Angliya kubogi va Liga kubogida g‘alaba qozondi.
Ikki marta mamlakat tomonidan yilning eng yaxshi futbolchisi deb topilgan, shuningdek, u Belgiya terma jamoasi uchun 99 marta maydonga tushgan va 26 ta gol urgan.
