Superliga va Pro ligada faoliyat yuritadigan hakamlar ishtirokida o‘tgan tur uchrashuvlari yakunlariga bag‘ishlangan seminar tashkil qilindi. Unda O‘FA rahbariyati, O‘zbekiston futbol hakamlari markazi vakillari, instruktorlar, hakamlar va nazoratchilar ishtirok etishdi. Yig‘ilish tanqidiy ruhda o‘tib, oxirgi tur uchrashuvlarida hakamlar tomonidan qayd etilgan xato va kamchiliklar o‘ganib chiqildi, tahlil qilindi va hakamlarga ogohlantirishlar berildi. Xatoga yo‘l qo‘ygan mutaxassislar quyi ligalarga tushirildi.

Seminarni O‘FA vise-prezidenti Ravshan Ermatov ochib berib, mamlakatimiz futboli rivojlanishi yo‘lida hakamlik zimmasida ham katta mas’uliyat yotganini alohida ta’kidladi:

«Assosiasiyaning futbolni rivojlantirish, xususan hakamlikni yangi darajaga olib chiqish yo‘lida olib borayotgan ishlariga barchangiz guvohsiz. Biroq oxirgi paytlarda aynan hakamlik bilan bog‘liq vaziyatlar sababli muxlislarda e’tirozlar paydo bo‘layotganiga guvoh bo‘lyapmiz. O‘FA saviyali hakamlikni o‘zining asosiy yo‘nalishlaridan biri sifatida tanlagani sababli muxlislar ham buni bizdan talab qilishga haqli. Barcha seminarlarda birinchi navbatda professionallikni talab qilamiz. O‘z bilim va ko‘nikmalari ustida doimiy ishlab boradigan hakam VAR yordamisiz uchrashuv tizginini nazorat qila oladi. Aynan shunday yondashuv bilan biz chempionatga bo‘lgan ishonch va qiziqishni kuchaytira olamiz. Agar bu vazifalarni to‘liq anglay olmayotgan, o‘z ishiga mas’uliyatsizlik bilan yondashayotganlar bo‘lsa, ularning faoliyatini qayta ko‘rib chiqamiz. Buyog‘iga faqat sifatli hakamlik kriteriylarga mos keladigan mutaxassislar bilan ishlaymiz va ularni xalqaro darajaga yetishishi uchun barcha imkoniyatlarni taqdim etamiz», — dedi Ravshan Ermatov.

Seminar davomida tajribali ekspertlar tomonidan tayyorlangan videoroliklar yordamida o‘tgan tur uchrashuvlari davomida qayd etilgan bahsli vaziyatlar tahlil qilindi. Xatolar ko‘rsatib o‘tilib, kamchiliklarni bartaraf etish, keyingi o‘yinlarda bu xatolarni takrorlamaslik uchun nimalarga ahamiyat qaratish zarurligi bo‘yicha ko‘rsatmalar berildi.