Hujumchi Joau Feliks "Atletiko Madrid"dan "Barselona"ga o‘tish uchun ko‘p million yevrodan voz kechishga qaror qildi. A Bola xabariga ko‘ra, u jami 17 million yevrodan ko‘proq summa yo‘qotadi.
23 yoshli portugaliyalik futbolchining "Atletiko Madrid" bilan mavsumiga 6 million yevro maosh oladigan shartnomasi bor edi. Kataloniya klubiga o‘tgani sababli unga faqat iyul va avgust oylari uchun maosh to‘langan, "Barselona" esa qolgan mavsum uchun atigi 400 ming yevro to‘laydi. Feliks birgina bu mavsumda deyarli besh million yo‘qotadi.
Shuningdek, futbolchini ijaraga qo‘yib yuborish uchun "Atletiko" Feliksdan klub bilan shartnomasini yana ikki mavsumga, ya’ni 2028 yilgacha uzaytirishni, maoshini 6 million yevrodan 3 million yevrogacha qisqartirishni talab qilgan. Shu tariqa, 24 emas, yana to‘rt mavsumda u bor-yo‘g‘i 12 million yevro ishlab oladi.
