Bir necha hafta davom etgan muzokaralardan so‘ng parijliklarning ikki futbolchisi Marko Verratti va Yulian Draksler Qatar chempionatiga o‘tish bo‘yicha kelishuvga erishdi, deb xabar bermoqda L'Equipe.
Nufuzli nashrning yozishicha, italiyalik yarim himoyachi Marko Verratti Fransiya poytaxtida o‘n yildan ko‘proq faoliyat olib borganidan so‘ng yaqin kunlarda “Al-Arabiy”ga o‘tadi. Yarim himoyachi o‘zining shaxsiy shartnomasi shartlarini kelishib oldi, ikki klub o‘rtasidagi kelishuv bir necha kun avval tuzilgan. Xabar qilinishicha, transfer summasi 40-50 million yevroni tashkil qiladi. Biroq Verratti hali tibbiy ko‘rikdan o‘tishi kerak.
Bundan tashqari, Verrattining hozirgi jamoadoshi, germaniyalik vinger Yulian Draksler ham Qatar chempionatiga o‘tadi. Nemis futbolchisi ham parijliklar murabbiylar shtabi rejalariga kiritilmagan va bu transfer borasida to‘liq kelishuvga erishilgan "Al-Ahli" (Doha) klubiga o‘tishi kerak.
