AQSH va O‘zbekiston terma jamoalari o‘rtasidagi o‘yinni to‘liq tomosha qilgan nafaqat o‘zbekistonlik, balki amerikalik muxlislar ham hisob o‘yinga mos bo‘lmaganini ta’kidlashmoqda.
O‘yindan oldingi barcha salbiy faktorlarni inobatga olgan holda, terma jamoamiz kutilganidan yaxshiroq o‘yin ko‘rsatdi deyish mumkin. Salbiy faktorlar quyidagilardan iborat edi:
— sust jismoniy tayyorgarlik va charchoq alomatlari;
— asosiy futbolchilarimizda o‘yin amaliyotining yo‘qligi;
— U-23 terma jamoasi futbolchilarining Osiyo kubogi saralashida qatnashayotganligi.
O‘yin boshida konsentrasiyaning yo‘qotilishi natijasida rikoshet orqali kiritilgan golni hisobga olmasa, jamoamiz maydonda bitta o‘yinchi kam qolgunga qadar yaxshi o‘yin ko‘rsatdi. O‘yinda zarbalar statistikasidagi ustunligimiz ham bunga yaqqol misol.
Terma jamoamizning 2-zonada to‘pni olib qo‘yib, tezkor qarshi hujumga o‘tishi natijasida Shomurodovda 2 ta 100 foizlik imkoniyat yuzaga keldi. Terma jamoamiz bu uslubni Katanes davrida yaxshi o‘zlashtirdi, ammo termamiz sardorining hozirgi formasi vaziyatlarni golga aylantirishga to‘sqinlik qildi. Eldordan tashqari, o‘yinni asosiy tarkibda boshlaganlardan Masharipov, O‘runov, Shukurov, Aliqulov va Ashurmatov turli sabablarga ko‘ra klublarida yetarlicha o‘yin amaliyotiga ega bo‘lmayapti.
Alijonov esa aksincha, o‘tgan oy davomida Superligada, kecha esa AQSHga qarshi o‘zining eng yaxshi formada ekanligini ko‘rsatdi. Aynan Alijonovning jarohati natijasida bitta o‘yinchi kam qolganimiz — o‘yin oxirida 2 ta gol o‘tkazib yuborishimizga sabab bo‘ldi. Maydonda uchta bo‘lib qolgan himoyachilarimiz yanada ehtiyotkor o‘ynash o‘rniga, hisobni tenglashtirish uchun o‘z pozisiyalarini tark eta boshlashdi va jazolanishdi.
2-bo‘lim o‘rtalarida hisobni tenglashtirish uchun Ashurmatov o‘rniga G‘aniyev tushirildi va 3-4-3 dan 4-3-3 sxemasiga o‘tildi. Hujumdagi faolligimiz oshishi bilan, himoyamizda ham bo‘sh zonalar yuzaga kela boshladi. Bu o‘yindan olingan asosiy saboq — o‘zimizdan kuchliroq terma jamoalarga qarshi baribir 3 ta markaziy himoyachi bilan o‘ynaganimiz ancha ishonchliroq ekanligiga amin bo‘ldik.
