АҚШ ва Ўзбекистон терма жамоалари ўртасидаги ўйинни тўлиқ томоша қилган нафақат ўзбекистонлик, балки америкалик мухлислар ҳам ҳисоб ўйинга мос бўлмаганини таъкидлашмоқда.

Ўйиндан олдинги барча салбий факторларни инобатга олган ҳолда, терма жамоамиз кутилганидан яхшироқ ўйин кўрсатди дейиш мумкин. Салбий факторлар қуйидагилардан иборат эди:

— суст жисмоний тайёргарлик ва чарчоқ аломатлари;

— асосий футболчиларимизда ўйин амалиётининг йўқлиги;

— U-23 терма жамоаси футболчиларининг Осиё кубоги саралашида қатнашаётганлиги.

Ўйин бошида консентрациянинг йўқотилиши натижасида рикошет орқали киритилган голни ҳисобга олмаса, жамоамиз майдонда битта ўйинчи кам қолгунга қадар яхши ўйин кўрсатди. Ўйинда зарбалар статистикасидаги устунлигимиз ҳам бунга яққол мисол.

Терма жамоамизнинг 2-зонада тўпни олиб қўйиб, тезкор қарши ҳужумга ўтиши натижасида Шомуродовда 2 та 100 фоизлик имконият юзага келди. Терма жамоамиз бу услубни Катанец даврида яхши ўзлаштирди, аммо термамиз сардорининг ҳозирги формаси вазиятларни голга айлантиришга тўсқинлик қилди. Элдордан ташқари, ўйинни асосий таркибда бошлаганлардан Машарипов, Ўрунов, Шукуров, Алиқулов ва Ашурматов турли сабабларга кўра клубларида етарлича ўйин амалиётига эга бўлмаяпти.

Алижонов эса аксинча, ўтган ой давомида Суперлигада, кеча эса АҚШга қарши ўзининг энг яхши формада эканлигини кўрсатди. Айнан Алижоновнинг жароҳати натижасида битта ўйинчи кам қолганимиз — ўйин охирида 2 та гол ўтказиб юборишимизга сабаб бўлди. Майдонда учта бўлиб қолган ҳимоячиларимиз янада эҳтиёткор ўйнаш ўрнига, ҳисобни тенглаштириш учун ўз позицияларини тарк эта бошлашди ва жазоланишди.

2-бўлим ўрталарида ҳисобни тенглаштириш учун Ашурматов ўрнига Ғаниев туширилди ва 3-4-3 дан 4-3-3 схемасига ўтилди. Ҳужумдаги фаоллигимиз ошиши билан, ҳимоямизда ҳам бўш зоналар юзага кела бошлади. Бу ўйиндан олинган асосий сабоқ — ўзимиздан кучлироқ терма жамоаларга қарши барибир 3 та марказий ҳимоячи билан ўйнаганимиз анча ишончлироқ эканлигига амин бўлдик.