"Barselona"ning 16 yoshli qanot hujumchisi Lamin Yamal maqtovlar olishda davom etmoqda.
"Ko‘k-anorranglilar" akademiyasi tarbiyalanuvchisi allaqachon o‘z klubi tarixida ham, Ispaniya terma jamoasida ham eng yosh debyutantga aylandi. Boz ustiga, yosh futbolchi terma jamoadagi ilk uchrashuvidayoq gol urdi.
"Lamin - men murabbiylik qilgan eng yaxshi futbolchi", - deydi "Barselona" yoshlar jamoasi sobiq murabbiyi Ivan Karrasko Diario AS nashriga. "Uning haqiqiy tabiiy qobiliyati bor. U boshqalar, jumladan, murabbiylar ham ko‘rmagan narsani ko‘ra oladi”, - deydi mutaxassis.
Joriy mavsumda Lamin Yamal "Barselona"ning asosiy jamoasi uchun to‘rtta o‘yin o‘tkazib, ikkita golli uzatmani amalga oshirdi.
