Madridning “Real” klubi himoyachisi Dan Karvaxal o‘zi haqida yolg‘on ma’lumot tarqatgani uchun OAVni sudga berdi. Bu haqda futbolchi ijtimoiy tarmoqda ma’lum qildi.
Shu haftada The Objective internet nashri 2018 yilgi jahon chempionatida Ispaniya terma jamoasi bilan ishlagan tarjimon bilan podkastni chop etdi. Uning aytishicha, Rossiyadagi jahon chempionati vaqtida Karvaxal mahalliy ofisiant ayolga nomaqbul taklif bilan chiqqan. Bundan tashqari, avvalroq ispan OAVlari madridlik futbolchi Ispaniyadagi o‘ta o‘ng milliy konservativ siyosiy partiyani qo‘llab-quvvatlashi haqida yozgan edi.
"Oxirgi kunlarda men haqimda matbuotda e’lon qilingan barcha ma’lumotlar mutlaqo yolg‘on. Siyosiy partiyalar bilan aloqalarimdan tortib, Rossiyada bo‘lib o‘tgan 2018-yilgi jahon chempionatidagi jinsiy zo‘ravonlikka qadar. Ommaviy axborot vositalari uchinchi shaxslarning so‘zlariga ishonib, mening nomim va sha’nimga tuhmat qilib, jazosiz yozishga haqli ekani afsusdaman. Men ularni sudga berdim" - deb post qoldirdi Karvaxal.
