Мадриднинг “Реал” клуби ҳимоячиси Дан Карвахаль ўзи ҳақида ёлғон маълумот тарқатгани учун ОАВни судга берди. Бу ҳақда футболчи ижтимоий тармоқда маълум қилди.
Шу ҳафтада The Objective интернет нашри 2018 йилги жаҳон чемпионатида Испания терма жамоаси билан ишлаган таржимон билан подкастни чоп этди. Унинг айтишича, Россиядаги жаҳон чемпионати вақтида Карвахаль маҳаллий официант аёлга номақбул таклиф билан чиққан. Бундан ташқари, аввалроқ испан ОАВлари мадридлик футболчи Испаниядаги ўта ўнг миллий консерватив сиёсий партияни қўллаб-қувватлаши ҳақида ёзган эди.
"Охирги кунларда мен ҳақимда матбуотда эълон қилинган барча маълумотлар мутлақо ёлғон. Сиёсий партиялар билан алоқаларимдан тортиб, Россияда бўлиб ўтган 2018-йилги жаҳон чемпионатидаги жинсий зўравонликка қадар. Оммавий ахборот воситалари учинчи шахсларнинг сўзларига ишониб, менинг номим ва шаънимга туҳмат қилиб, жазосиз ёзишга ҳақли экани афсусдаман. Мен уларни судга бердим" - деб пост қолдирди Карвахаль.
