Sun’iy ong 2023/24 yilgi mavsum so‘nggida "Manchester Yunayted" va "Chelsi" kuchli to‘rtlikka kira olmasligini bildirdi. APLda YECHLga chiqish borasida ozgina o‘zgarish yuz beradi. Qayd etilishicha, "tumanli Albion" klublari uchun, endilikda, beshinchi o‘rin ham Yevropaning eng nufuzli turniriga borish uchun yetarli bo‘lishi mumkin. Ammo bu narsa mavsum davomida ingliz jamoalarining yevrokuboklarda qanchalik yaxshi qatnashishiga bog‘liq bo‘ladi. So‘nggi 11 mavsumda 5 o‘rinni olganlar ham YECHLga chiqishi mumkin edi. Ammo faqatgina 4 ta klubga yo‘llanmalar taqdim etib kelingan.
"Opta" taqdim etgan ma’lumotlarga ko‘ra, yangi mavsum oxirida "Manchester Siti", "Liverpul", "Arsenal" hamda "Tottenxem"gina YECHLga chiqish imkoniga ega bo‘ladi. Xususan, bu borada "Manchester Siti", "Liverpul" va "Arsenal"ning imkoniyatlarini superkompyuter 80 foizdan ortiq deb biladi. "Shaharliklar" esa 99.93 foizlik ijobiy ehtimolga ega. "Tottenxem"niki ancha kam, 31.68 foizga teng. Ammo "shporlar" eng yaqin ta’qibchisi bo‘lgan "MYU"dan 3 foiz ko‘p imkoniyatga ega. "Qizil iblislar"ning ehtimoliy yo‘llanma olishi 4 ta tur natijalaridan keyin 63.2 foizdan 28.4ga tushib qolgan.
Top-klublardan keyingi o‘rinlarda ikkinchi eshelondagi jamoalar keladi. Ular ichida "Brayton", "Nyukasl", Vest Xem" va "Aston Villa" bor. Ularning imkoniyatlari 7 foizdan 20 foizgacha baholangan. Bu yerda "Nyukasl"ni alohida e’tiborga olish kerak. Garchand joriy yilda YECHL ishtirokchisi bo‘lsa ham, Eddi Xau jamoasi bundan keyin ochko yig‘ishga qiynalishi aytilmoqda. "Brentford" 4.18 foizlik yevrokubok imkoniyatiga ega va bu nisbatan yaxshi ko‘rsatkich sanaladi. Top-10 pog‘onasidan tushib qolgan nom esa sizni hayratga solishi aniq.
Maurisio Pochettino shogirdlarining imkoniyatlari YECHL uchun o‘ta past deb hisoblanmoqda. Superkompyuter "Chelsi"ga atigi 1.3 foizlik ehtimol bergan. Bir necha hafta oldin ularda 16 foiz imkoniyat bor edi. Ammo "Vest Xem" hamda "Nottingem"ga uchralgan mag‘lubiyatlar vaziyatni o‘zgartirib yubordi.
Sun’iy ong APLdan tushib ketish ehtimollarini ham hisoblab chiqdi. Bu borada favorit sifatida "Luton" (68.15), "Sheffild Yunayted" (64.46) hamda "Everton" (52.34) nomlari keladi. Ulardan keyin "Byornli", "Bornmut" hamda "Vulvz" qayd etildi. Ligadan tushib ketish masalasida "Chelsi"ning imkoniyatlari 0.99 foizga teng xolos.
ISMATOV J.
