"Paxtakor" va "Al Ayn" jamoalari o‘yinidan oldingi matbuot anjumanida bosh murabbiy Maksim Shaskix va yarim himoyachi Sardor Sobirxo‘jayev ishtirok etdi.

Shaskix: - Ertangi o‘yinni bir yarim yil kutdik. Mana o‘sha vaqt keldi. Ertaga yaxshi o‘yin namoyish etamiz deb o‘ylayman. Raqib ham yaxshi jamoa va kuchli futbolchilarga ega. Biz ertaga o‘z o‘yinimizni raqibga o‘tkazishni harakat qilamiz.
Jamoada o‘zgartirib bo‘lmas futbolchilar yo‘q. Ularning o‘rnini boshqa futbolchilar bilan to‘ldiramiz. Tarkibimizda futbolchilar yetarlicha. Umid qilamanki, ertaga tarkibdagi o‘zgarishlar bizga qiyinchilik to‘g‘dirmaydi.

Ayni damdagi maqsadimiz guruhdan chiqish. Keyingi bosqichga chiqqanimizdan so‘ng, maqsadlar o‘zgarishi aniq, ammo hozirgi asosiy maqsadimiz pley-off bosqichiga chiqish.

"Bunyodkor" stadionida mashg‘ulot o‘tkazdik va maysa holati yaxshi. Muhimi biz o‘z o‘yimizda o‘ynamoqdamiz va muxlislar yonimizda bo‘lishadi. Avvalgi mavsumlar esa ayrim bir sabablarga ko‘ra buning iloji yo‘q edi. Endi bemalol uy va mehmonda o‘ynay olamiz. Ertaga muxlislar ajoyib atmosfera yaratib berishadi degan umiddaman.

Osiyo chempionlar ligasida kuchsiz jamoalar bo‘lmaydi. Barcha jamoalar guruh bosqichiga chiqish uchun uzoq yo‘lni bosib o‘tadilar. Barcha raqiblar kuchli va ularni o‘rganib chiqamiz, faqat "Axal" jamoasiga qarshi o‘yinlar qiyin kechishi aniq. Sababi ular haqida ma’lumot juda-juda kam. Barchasi o‘z qo‘limizda.

Bizda har doim turli rejalar bor. Biz taktik uslub yoki o‘yin sxemasini o‘zgartirishimiz mumkin. Har doim o‘zgarishlar qilishga tayyormiz va ertangi o‘yinda buni bilib olasizlar.

Sobirxo‘jayev: - Ertaga chempionlar ligasidagi yurishimizni boshlaymiz. Eng muhimi, barcha futbolchilar ertangi o‘yinga tayyor va muxlislarga ma’qul keladigan o‘yin namoyish etamiz.