"Manchester Yunayted" ustida yana qora bulutlar suza boshladi. Erik ten Xag jamoasi yangi mavsumning 5 ta bahsidan 3 tasida mag‘lubiyatga uchradi. Bu esa jamoa kayfiyatiga ham ta’sir qilmoqda. Xabarlarga ko‘ra, 4 ta "MYU" yulduzi ishtirokida kiyinish xonasida janjal bo‘lib o‘tgan. Shu kabi voqealar haqida klub afsonasi Gari Nevill kayfiyatsiz futbolchilar jamoa uchun "xavfli" ekani, ular muammo va "noqulayliklar" keltirib chiqarishi mumkin ekanini bildirgandi. Shunday voqea allaqachon sodir bo‘lgan. "MYU"ning o‘z uyidagi "Brayton"ga mag‘lubiyati vaziyatni og‘irlashtirdi.
Jamoa sardori Brunu Fernandesh o‘z jamoadoshi Skott Maktominey bilan urshib qolgan. Shuningdek, himoyachilar Lisandro Martines va Viktor Lindelyoflar ham bir-biriga baqirib, janjal ko‘targan. Buni ko‘rgan ten Xag vaziyatni yumshatishga harakat qilib, futbolchilardan "o‘zlarini bosib olish"ni so‘ragan. Niderlandiyalik mutaxassis avvalroq Jeydon Sanchoni jamoaviy mashg‘ulotlardan chetlatgan edi. Shuningdek, 53 yoshli murabbiy Meyson Grinvud va Antonidan ham ayrilgan. Xarri Maguayr esa mavsum avvalida sardorlikdan mahrum etilgan edi. Qolaversa, himoyachi asosiy tarkibdan chiqarib tashlangan.
Gari Nevill o‘z sahifasida shunday degan edi: "Kiyinish xonasida Sancho va Maguayr qanchalik muhim figuralar? Menimcha, hozir ten Xagda yaxshi natijalarga halaqit qiluvchi muammolar bor va ularning hammasi icharikda. Biz bu haqida bila olmaymiz. Jamoada akademiyadan chiqqan hujumchi bor edi. Ammo hozir u bu yerda emas. Jamoada Xarri kabi futbolchi bor va u 12 oy oldin jamoa sardori edi. Ammo hozir u 3, 4 yoki beshinchi tanlov futbolchisiga aylandi. Demak, nimadir xato ketyapti".
"Ten Xag hal qilishi mumkin bo‘lgan masalalar bisyorga o‘xshaydi. Afsuski, biz bu haqida bilmaymiz. Ammo ularning o‘zlari ham jamoada nima darz ketganini hali aniq ayta olmaydi. Fergyusondan keyin ko‘p murabbiylar almashdi. Ularning hammasi jamoadagi muammolarni bilgan. Umid qilamanki, hozirgi vaziyat faqatgina murakkab mavsum avvali xolos. Ten Xag Mourinyo, van Gal, Devid Moyes, Rangnik va Sulsher tushgan holga tushmaydi".
Eslatib o‘tamiz, "MYU" ertaga YECHLning 1 turida "Bavariya" bilan to‘qnash keladi.
ISMATOV J.
