SSKA yarim himoyachisi Abbosbek Fayzullayevning birinchi murabbiyi Dmitriy An futbolchiga Moskva klubiga o‘tishni maslahat berganini aytdi.

"Men uning Rossiyadagi muvaffaqiyatlarini kuzatib boramanmi? Albatta, O‘zbekistonda xususiy kompaniyalar bor, ular orqali qo‘shimcha kanallarni, jumladan, "Match TV"ni tomosha qilish mumkin va ular orqali Rossiya chempionati o‘yinlarini tomosha qilaman. Abbosning SSKAdagi startini muvaffaqiyatli deb atash mumkin, u jamoaga yaxshi singib ketdi. Terma jamoa saralash o‘yinlari vaqtida Abbos O‘zbekistonga keldi, u bilan uchrashib, muloqot qilishga muvaffaq bo‘ldik. U muvaffaqiyatga erishayotganidan juda xursandman. Hozir do‘stlarim Fayzullayevning muvaffaqiyatli o‘yinlaridan keyin menga tez-tez xat yozishadi va tabriklashadi.

Abbosbek qachon SSKAni tanlagan? SSKAga o‘tishdan biroz oldin Abbos bilan uchrashdik, o‘sha paytda u hali yakuniy qarorga kelmagan edi, lekin men unga SSKAga o‘tishni maslahat berdim. U: "Men Yevropaga borishni xohlayman", dedi. Men unga javob berdim: "Abbos, senda hozirda Yevropa chempionatlaridan hech qanday taklif yo‘q, SSKA ajoyib tramplin bo‘ladi." Qolaversa, Rossiyada futbol saviyasi O‘zbekistonnikidan yuqori, deganman”, — dedi An Metaratings.ru bilan suhbatda.

Fayzullayev 2023 yilning avgustida “Paxtakor”dan SSKAga o‘tgan edi. Transfer summasi 500 ming yevroni tashkil etdi. 19 yoshli yarim himoyachining klub bilan tuzgan shartnomasi 2026 yilning yoziga qadar amal qiladi. Transfermarkt portali Fayzullayevni 750 ming yevroga baholamoqda.

Joriy mavsumda Fayzullayev barcha turnirlarda oltita o‘yin o‘tkazib, bitta gol urdi va bitta golli uzatmani amalga oshirdi.