OKMK Osiyo chemponlar ligasining joriy mavsumini muvaffaqiyatli boshlay olmadi. Ilk turda "Al-Ittihod" klubiga safarda yutqazib qo‘ygan olmaliqliklar bugun o‘z maydonlarida Iroqning "Al-Quva al-Javiya" jamoasiga imkoniyatni boy berishdi.

Har ikkala bo‘limning avvali OKMK uchun omadsiz keldi. 2-daqiqada Shohruh Gadoyev yo‘q joydan to‘pni Ali Jassim uzatib berdi. Iroqlik futbolchi esa Sardor Rahmonovni chalg‘itib kuchli zarba bilan mezbonlar darvozasini ishg‘ol qildi.

Ikkinchi bo‘lim boshida esa "Eyr Fors" olis masofadan jarima zarbasini tepdi. Kuchli yo‘llangan zarbani OKMK posboni qaytardi. Qaytgan to‘pni Rahmonov yon tomonga tepib yuborganida o‘sha joyda yugurib kelgan Sanjar Tursunovga to‘p tegib, to‘rga borib tushdi.

Olmaliqliklar vaziyatni o‘nglash uchun juda kech harakat qilishdi. Birinchi bo‘lim so‘ngida Haqnaziy tomonidan bosh bilan yo‘llangan zarbani "Al-Quva al-Javiya" posboni qaytarishga muvaffaq bo‘ldi.

Nihoyat 81-daqiqa kelib Siyovashning o‘zi hisobdagi farqni bittaga qisqartirishga muvaffaq bo‘ldi. Mirjalol Qosimov shogirdlari mag‘lubiyatdan qutulib qolishlari mumkin edi. Ammo murabbiyning o‘g‘li — Mirjamol tomonidan yo‘llangan zarbani iroqlik darvozabon qaytarishga erishdi.

Shu tariqa, OKMK ikkinchi o‘yinda ham yutqazgan bo‘lsa, "Al-Quva al-Javiya" o‘z ochkolarini 4 taga yetkazib oldi.

OCHL, "S" guruhi, 2-tur
OKMK - "Eyr Fors" - 1:2 (0:1)
Gollar: Siyovash Haqnazariy (81) — Ali Jassim (2), Sanjar Tursunov (48-avtogol)
OKMK: 25. Valijon Rahimov, 3. Sardor Rahmonov (Baxtiyor Qosimov, 90), 7. Dilshod Ahmadaliyev, 9. Ruben Sanchez (Akrom Komilov 71), 10. Xurshid G‘iyosov, 14. Mirjahon Mirahmadov (Martin Boake, 46), 15. Oybek Rustamov, 17. Sanjar Tursunov (4. Mirjamol Qosimov, 71) 20. Islom To‘xtaxo‘jayev, 22. Shohruh Gadoyev (Muhammadanas Hasanov, 90+3), 88. Siyavash Haqnazariy.
“Eyr Fors”: 20. Muhammad Hamid, 2. Jait Marufi, 8. Ibrahim Bayesh, 10. Ali Jasim, 13. Franko Atchou, 18. Franko Abogo, 19. Muhammad Qosim, 25. Saad Abdulamir, 40. Bakariy NdaYE, 44. Hammud Mashaan, 48. Ruslan Hanoon.
Ogohlantirishlar: Ruslan Hannon (35), Mirjamol Qosimov (76).