Tadbirni O‘zbekiston futbol assosiasiyasi birinchi vise-prezidenti Ravshan Irmatov ochib berdi.
O‘rta Osiyo hamda Yevropa milliy assosiasiyalar seminarining barcha ishtirokchilarini tabrikladi va uning yuqori darajada tashkil etilishida jonbozlik ko‘rsatgan FIFA, OFK va UYEFA rahbariyatiga minnatdorchiligini bildirdi.
«Mamlakatimizda futbolning ommaviyligini yanada oshirish, istiqbolli va iqtidorli futbolchilarni tanlash hamda professional darajada tayyorlashning yangi tizimini yo‘lga qo‘yish maqsadida Prezidentimiz Shavkat Mirziyoyev tashabbusi bilan qarorlar qabul qilinmoqda.
Turli yosh toifasidagi O‘zbekiston milliy terma jamoalari soni 8 tadan 19 taga yetkazilib, ularga sifatli ta’lim beradigan murabbiylar soni esa 5 barobargacha oshirildi. FIFA bilan O‘zbekiston futbol assosiasiyasi hamkorligi mutlaqo yangi bosqichga chiqdi va tarixda ilk bor futzal bo‘yicha 2024 yilgi Jahon chempionatini O‘zbekistonda o‘tkazish huquqi qo‘lga kiritildi.
Bugungi seminar davomida futbol infratuzilmasi, moliyaviy investisiyalarni optimallashtirish, futzal, ayollar hamda bolalar futboli, xalqaro musobaqa va tadbirlarni yuqori darajada tashkil etish mavzulari muhokama qilinadi va o‘zaro tajriba almashiniladi. O‘ylaymanki, mazkur hamkorlik, mintaqalarda futbolni yanada rivojlantirishga hamda millatlararo do‘stlikni yanada mustahkamlashga zamin bo‘ladi», – deya qayd etdi Ravshan Irmatov.
