Futbol bo‘yicha O‘zbekiston olimpiya terma jamoasi o‘z tarixida ilk marta Osiyo O‘yinlarining bronza medalini qo‘lga kiritdi.

Temur Kapadze jamoasi 3-o‘rin uchun Gonkongga qarshi o‘yinda yirik hisobda g‘alaba qozondi. Raqib esa birinchi bo‘limni juda yaxshi o‘tkazdi. Hattoki o‘yin boshida darvozamiz tomon bosim o‘tkazib, gollar urishga yaqin kelgandi. Ammo ular vaziyatlardan foydalana olishmadi.

Biz esa birinchi taym so‘ngida hisobni ochdik. Alisher Odilov jarima maydoni chizig‘i ustidan bir raqibni chalg‘itib, chap oyoqda kuchli zarba bilan to‘pni darvoza burchagiga joylab qo‘ydi — 1:0.

Ikkinchi bo‘lim boshida ideal qarshi hujum tashkil qildik. Erkinov-Mahamadjonov-Norchayev kombinasiyasidan keyin Husayn bo‘sh darvozani ishg‘ol qildi.

Ushbu gol amalda Gonkongni "sindirdi". Keyingi daqiqalarda O‘zbkeiston ancha "ochilib" harakat qila boshladi. Buning natijasida raqib darvozasiga yana ikki marta yo‘l topildi. Norchayev dublga erishgan bo‘lsa, Alibek Davronov yaqin masofadan to‘pni darvozaga burib yubordi — 4:0.

Shu tariqa, O‘zbekiston delegasiyasining medallari soni 67 taga yetdi — 20 oltin, 18 kumush va 29 bronza.

Xanchjou-2022. Futbol. 3-o‘rin uchun o‘yin
O‘ZBEKISTON - GONKONG - 4:0 (1:0)
Gollar: Alisher Odilov (43), Husayn Norchayev (49, 59), Alibek Davronov (74)
O‘zbekiston U-23: 12. Vladimir Nazarov, 2. Saidazamat Mirsaidov (14. Ibrohimxalil Yo‘ldoshev, 86), 3. Mahmudjon Mahamadjonov, 5. Muhammadqodir Hamraliyev, 6. Behzod Shamsiyev (4. Shohjahon Sultonmurodov, 86), 7. Hojimat Erkinov, 8. Ibrohim Ibragimov, 11. Otabek Jo‘raqo‘ziyev (10. Jasurbek Jaloliddinov, 69), 18. Alibek Davronov, 19. Husayn Norchayev (9. Ulug‘bek Hoshimov,69), 22. Alisher Odilov (20. Ruslanbek Jiyanov, 69).
Gonkong U-23: 19. Se Ka Ving, 3. Jojo Kristian Aleksander, 4. Li Ngai Xoi, 6. Vu Chun Ming, 9. Orr Metyu Elliot Ving Kai, 10. Sun Ming Xim, 11. Pun Pui Xin, 13. Xan Jahangir, 14. Yu Jesse Joy Yin, 16. Lam Xin Ting, 22. Kang Yi Xang Ellison.
Ogohlantirishlar: Ulug‘bek Hoshimov (80), Vu Chun Ming (86).