Superliga 21-turida o‘z maydonida “Navbahor”ga mag‘lub bo‘lgan “Buxoro” klubi bosh murabbiyi Ulug‘bek Baqoyev mag‘lubiyat sabablari haqida gapirdi.

“Hisob barchasini ko‘rsatib turibdi. Raqib bizni har jabhada mag‘lub etdi. Jamoalar orasida farq katta. Daraja, saviya turli xil. Raqibni g‘alaba bilan tabriklayman”, - dedi Baqoyev.

“Gol o‘tkazib yuborgach albatta oldinga yugurdik. Bu raqibga yordam berdi. Bunday jamoaga qarshi bunday o‘ynash qiyin. Tarkibida saviyali o‘yinchilar bor va ular o‘yinni hal etishdi”.

“Zaxiradan maydonga tushgan futbolchilar o‘yinni o‘zgartirish uchun tushirilgani tabiiy hol. Ammo, bugun o‘yinni kuchaytira oladigan futbolchilarimiz yo‘q. Yozgi transfer oynasida limit va moddiy imkoniyatlarimizdan kelib chiqib sanoqli futbolchilarnigina jalb etdik. Ammo, bu ligada boshqa jamoalar bilan raqobat qilish uchun kamlik qilayapti”.

“Imkoniyat har doim bo‘lgan. Balki keyingi o‘yinlarda kerakli natijalarga erisha olarmiz. Shu bilan birga jamoa muxlislariga sabr bilan bizni qo‘llab-quvvatlab kelayotganlari uchun rahmat. Bir oy yoki bir yilda jamoa tuzish qiyin. Raqobatbardosh va sovrinli o‘rinlar uchun kurashadigan jamoa bo‘lishi uchun vaqt kerak”.