O‘zbekiston va Vyetnam terma jamoalari o‘rtasidagi nazorat uchrashuvida vyetnamliklar darvozamiz tomon umuman zarba berishmadi. Ya’ni qo‘shib berilgan vaqtlarni hisoblaganda, 95 daqiqa davomida himoyachilarimiz raqib futbolchilariga zarba berish uchun umuman imkoniyat berishmadi.

Ushbu uchrashuvda O‘zbekiston terma jamoasining 22 ta futbolchisi maydonga tushirildi, faqatgina darvozabon Abduvohid Ne’matov keyingi o‘yinga olib qo‘yilgan bo‘lsa ajab emas.

Terma jamoamiz birinchi bo‘limda 3-4-3 (himoyada 5-4-1) taktik sxemasi ostida harakat qilgan bo‘lsa, ikkinchi bo‘limda hujumga Bobur Abdiholiqov va Jasur Yaxshiboyevni tushirish orqali 3-5-2 (himoyada 5-3-2) sxemasiga o‘tildi.

Terma jamoamizda har bir pozisiyada raqobat borligi va to‘laqonli 2 ta tarkibning shakllanayotgani odamni xursand qiladi. Faqatgina o‘ng qanot himoyasida Hojiakbar Alijonovga raqobat qila oladigan futbolchi topilmayapti. Alijonov almashtirilgach esa, uning o‘rnida o‘ng qanot vingeri Aziz Turg‘unboyev harakat qildi. Zarur hollarda, Farruh Sayfiyev ham o‘ng qanot himoyasida o‘ynay olishini esdan chiqarmaymiz.

Yosh futbolchilarimiz Abbos Fayzullayevning maydonga tushirilishi hujum chizig‘iga kreativlik olib kelgan bo‘lsa, Husanov va Davronovning qo‘shilishi esa himoyaga xotirjamlik taqdim etdi. Husanovning xuddi "Lans"dagi kabi hujumga yordam berish uchun raqib jarima maydonigacha kelishi e’tiborimizni tortdi.

Vyetnamdan bunday yopiq va himoyaviy futbolni ko‘pchilik kutmagan bo‘lsa kerak. Ba’zi vaziyatlarda raqibimizning maydon markazidan ham o‘tmagani - Osiyo kubogi saralashidagi Shri-Lankaga qarshi o‘yinni eslatib yubordi. Futbolchilarimiz o‘z vaziyatlaridan unumliroq foydalanganda, hisob yanada yirikroq ko‘rinish olgan bo‘lar edi.

Terma jamoamiz o‘yinini Xitoy terma jamoasi bosh murabbiyi Aleksandar Yankovich stadiondan tomosha qilgan. Futbolchilarimiz Vyetnam darvozasiga kiritilmagan gollarni Xitoy uchun olib qo‘yishgan deb umid qilamiz.