Ўзбекистон ва Вьетнам терма жамоалари ўртасидаги назорат учрашувида вьетнамликлар дарвозамиз томон умуман зарба беришмади. Яъни қўшиб берилган вақтларни ҳисоблаганда, 95 дақиқа давомида ҳимоячиларимиз рақиб футболчиларига зарба бериш учун умуман имконият беришмади.

Ушбу учрашувда Ўзбекистон терма жамоасининг 22 та футболчиси майдонга туширилди, фақатгина дарвозабон Абдувоҳид Неъматов кейинги ўйинга олиб қўйилган бўлса ажаб эмас.

Терма жамоамиз биринчи бўлимда 3-4-3 (ҳимояда 5-4-1) тактик схемаси остида ҳаракат қилган бўлса, иккинчи бўлимда ҳужумга Бобур Абдиҳолиқов ва Жасур Яхшибоевни тушириш орқали 3-5-2 (ҳимояда 5-3-2) схемасига ўтилди.

Терма жамоамизда ҳар бир позицияда рақобат борлиги ва тўлақонли 2 та таркибнинг шаклланаётгани одамни хурсанд қилади. Фақатгина ўнг қанот ҳимоясида Ҳожиакбар Алижоновга рақобат қила оладиган футболчи топилмаяпти. Алижонов алмаштирилгач эса, унинг ўрнида ўнг қанот вингери Азиз Турғунбоев ҳаракат қилди. Зарур ҳолларда, Фарруҳ Сайфиев ҳам ўнг қанот ҳимоясида ўйнай олишини эсдан чиқармаймиз.

Ёш футболчиларимиз Аббос Файзуллаевнинг майдонга туширилиши ҳужум чизиғига креативлик олиб келган бўлса, Ҳусанов ва Давроновнинг қўшилиши эса ҳимояга хотиржамлик тақдим этди. Ҳусановнинг худди "Ланс"даги каби ҳужумга ёрдам бериш учун рақиб жарима майдонигача келиши эътиборимизни тортди.

Вьетнамдан бундай ёпиқ ва ҳимоявий футболни кўпчилик кутмаган бўлса керак. Баъзи вазиятларда рақибимизнинг майдон марказидан ҳам ўтмагани - Осиё кубоги саралашидаги Шри-Ланкага қарши ўйинни эслатиб юборди. Футболчиларимиз ўз вазиятларидан унумлироқ фойдаланганда, ҳисоб янада йирикроқ кўриниш олган бўлар эди.

Терма жамоамиз ўйинини Хитой терма жамоаси бош мураббийи Александар Янкович стадиондан томоша қилган. Футболчиларимиз Вьетнам дарвозасига киритилмаган голларни Хитой учун олиб қўйишган деб умид қиламиз.