Kilian Mbappe Fransiya terma jamoasiga «PSJ»dagi gol qurg‘oqchiligi mavsumidan keldi, biroq dubli bilan terma jamoani Yevroga olib chiqdi.
Quyida bu qanday sodir bo‘lganini tushunishga harakat qilamiz.
«PSJ»da gol qurg‘oqchiligi, lekin terma jamoa uchun gollar
Kilian Mbappe «PSJ» safida qatorasiga to‘rtta o‘yinda gol ura olmadi - u klub uchun oxirgi marta 19 sentyabr kuni Chempionlar ligasi doirasida Dortmundning «Borussiya»si bilan o‘yinda penaltini aniq amalga oshirib gol urgan edi. Shundan so‘ng Mbappega omad kulib boqmadi. Fransiya 1-ligasida forvard «Marsel» bilan o‘yinda (ammo o‘sha uchrashuvda u atigi 32 daqiqa o‘ynadi), shuningdek, «Klermon» va «Renn» bilan o‘yinlarda gol ura olmadi. Qolaversa, Mbappe «Nyukasl» bilan o‘yinda ham golsizlikdan aziyat chekdi.
Biroq Fransiya terma jamoasida forvard ishtahasi yaxshi ekanini ko‘rsatdi. Gollandiya mehmoni bo‘lgan fransuzlar safida Mbappe Klaus va Rabyoning uzatmalarini aniq zarbaga aylantirdi. Bu gollar «uch ranglilar»ga nafaqat g‘alaba, balki bo‘lajak qit’a chempionatiga yo‘llanmani ham keltirdi.
Mbappe «PSJ»dagi asosiy yulduzlik maqomiga dosh bera olmayaptimi?
Joriy mavsumda Mbappe nihoyat o‘zi uzoq vaqtdan beri orzu qilgan «PSJ»sida asosiy yulduz maqomini oldi. Yozda Lionel Messi jamoani tark etdi, uning kelishi tufayli ikki yil oldin fransiyalik deyarli hamma bilan janjallashib qolgandi. Oradan biroz vaqt o‘tib Mbappe bilan janjallashib qolgan Neymar ham ketdi. Shundan so‘ng yulduzlar uchligidan faqat fransuz qoldi.
Usmon Dembele, Randal Kolo-Muani, Marko Asensio, Gonsalu Ramush ham yorqin o‘yinchilar, ammo ularning mavqeyi yangi sheriginikidan jiddiy ravishda pastroq. Qolaversa, «PSJ» Mbappega sherik sifatida daraja jihatdan o‘ziga mos keladigan futbolchilarni tanlab oldi. Endi fransuzning hujumda tez yugura oladigan sheriklari bor.
Biroq, Mbappe kutilmaganda yangi maqomga to‘liq tayyor emasligi ma’lum bo‘ldi, degan fikrlar yuzaga keldi. Endi «PSJ» o‘yinida ma’lum bir inqiroz bor va aynan fransuz jamoani qiyin davrda sudrab olib yurishi kerak edi. Biroq Mbappe bunga dosh bera olmadi. Shu ma’noda unga terma jamoada ancha oson, chunki u terma jamoaning asosiy yulduzi bo‘lsada, yagona lider emas.
Bu pozisiya masalasimi?
«PSJ»da Luis Enrike xohlagan to‘pga egalik qilish usuli hali ko‘p vaqtni talab etadi, ammo hujum harakatlariga urg‘u berilmaydi.
Enrike qo‘l ostida Mbappe tez-tez hujum markaziga yaqinroq o‘ynadi, u yerda o‘zini juda ishonchli his qilmayapti. Chap qanot hujumchisi sifatida u so‘nggi yillarda dunyoning eng muvaffaqiyatli o‘yinchilaridan biriga aylandi va top yulduz maqomiga erishdi. Aynan shu rolda Desham undan foydalanishda davom etmoqda. Biroq ispaniyalik murabbiy Mbappeni biroz boshqacharoq rolda ko‘rishni istayapti va bu unchalik yaxshi samara bermayapti, buni oxirgi o‘yinlar ko‘rsatmoqda.
PSJ Mbappe bilan nima qilishi kerak?
Umuman olganda, Mbappening «PSJ» uchun yuzaga keltiradigan muammosi kengroq. Luis Enrike yangi jamoa tuzmoqda va buni asosiy yulduz atrofida qilish mantiqan to‘g‘ri keladi. Biroq Mbappe kelasi yozda tugaydigan shartnomasi bilan jamoaga katta yordam bera olmaydi, unda buning uchun motivasiya ham yo‘q. Ya’ni, jamoa unga bog‘liq bo‘lib turgan holatda Enrikening forvardga umid qilishidan foyda yo‘q.
Boshqa tomondan, Enrike o‘zidan oldingilarning faoliyati Parijda qanday yakunlanganini eslashi kerak. Bu yerda Chempionlar ligasi pley-off bosqichidagi muvaffaqiyatsizliklardan so‘ng murabbiylar tezda ishdan bo‘shatiladi. Enrike hozirgi tajribalari jamoani guruhdan olib chiqa olmasligi mumkin. Bunday vaziyatda Enrike Mbappe o‘zini har tomonlama qulay his qilishi uchun vaziyat yaratib berishi kerak, Kilian o‘zining maksimal o‘yini bilan ispaniyalikning ishini saqlab qoladi.
