Bryussel 16 oktyabr oqshomida ikki shved muxlisining o‘ldirilishi ortidan terrorchilik tahdidining eng yuqori darajasida qolmoqda, deb xabar bermoqda HLN.
Belgiya polisiyasi jinoyatda gumonlanuvchi haqida ma’lumot oldi - bu mamlakatda noqonuniy yashovchi tunislik, radikallashuvi bilan tanilgan 45 yoshli Abdusalom Lassue. Polisiya uning Bryussel kommunalaridan biri bo‘lgan Sxarbekdagi uyida tintuv o‘tkazdi. Gumonlanuvchi topilmadi, qidiruv davom etmoqda.
Shvesiyalik muxlislarga qilingan hujumda jarohatlangan taksi haydovchisiga tibbiy yordam ko‘rsatildi. Uning hayoti xavf ostida emas.
Maktablar yopilmaydi. Belgiya bosh vaziri Aleksandr De Kruning so‘zlariga ko‘ra, terrorchilik tahdidini tahlil qiluvchi organ tomonidan o‘tkazilgan tahlillar bolalar va maktablar uchun o‘ziga xos xavf yo‘qligini ko‘rsatdi.
Polisiya Shvesiya fuqarolarini maxsus kuzatuv bilan ta’minladi. Shvedlar Bryusselga milliy terma jamoaning Belgiyaga qarshi Yevro-2024 saralash o‘yini uchun yetib kelishdi. Terakt haqida jamoalar xabar topishi bilan o‘yin tanaffusda to‘xtatildi. Yakunda UYEFA o‘yinni bekor qildi.
