“Andijon” Jizzaxda “So‘g‘diyona”ga qarshi bo‘lib o‘tgan uchrashuvda o‘z irodasini namoyish qilib, mag‘lubiyatni g‘alabaga aylantira oldi. Buning uchun barcha futbolchilar oxirigacha mehnat qilishdi va uch ochkoni qo‘lga kiritishlariga to‘liq ishondilar. Natijada “Burgutlar” Jizzaxda ham parvozini amalga oshirdi.

Zaxiradan o‘yinga qo‘shilgan Farhod Sohibjonov oxirgi daqiqalarda g‘alaba keltiruvchi gol muallifiga aylandi. Futbolchi “Andijon” matbuot xizmatiga qisqacha intervyu berdi.

— Farhod, safarda qo‘lga kiritilgan ajoyib g‘alaba bilan tabriklayman. Uchrashuv borasida nimalarni ayta olasiz?
— Avvalambor, Andijon xalqini va “Andijon” muxlislarini g‘alaba bilan tabriklayman. O‘zinglar ko‘rganinglardek, og‘ir o‘yin bo‘ldi. Ikkinchi taymda qattiq harakat qildik. Shuning evaziga g‘alabani qo‘lga kiritdik, Xudoga shukr. 1:0 hisobida yutqazayotgandik, kichik kambekni amalga oshirdik. Bu g‘alabada murabbiyimizning hissasi katta. O‘yinchi almashtirishlarni to‘g‘ri qildi, deb o‘ylayman.

— Zaxiradan maydonga tushib gol urdingiz va aynan hal qiluvchi golni urishingizni aniq kutganmidingiz?
— O‘yindan oldin kutgandim. 1:0 hisobida mag‘lubiyatga uchrayotganimiz bois ikkinchi bo‘limga hamma futbolchilarni ko‘zi “yonib” maydonga tushishdi. Menda ham shunaqa holat bo‘ldi.

— Afsuski, bahs oxirida qizil kartochka tufayli maydondan chetlatildingiz. Buni qanday izohlaysiz?
— O‘sha vaziyatda o‘z hissiyotlarimni boshqara olmadim, deb o‘ylayman.

— Birinchi davrada "Andijon" “So‘g‘diyona”ga xuddi shu hisobda yutqazgandi...
— Ha, revansh olindi.   

“Andijon” matbuot xizmati.