APL o‘tgan hafta yana qaytdi. Unda bir qator o‘yinlar bo‘lib o‘tdi. Garchand mavsumni yomon boshlagan bo‘lsa ham, sakkizinchi turda "Manchester Yunayted" "Sheffild Yunayted"ni mag‘lubiyatga uchratib, o‘zi uchun kerakli uch ochkoni qo‘lga kiritdi. Bu yetarli emas, albatta. Muxlislar "MYU"ning hozirgi o‘rnidan qoniqish hosil qilmasligi aniq. Negaki, ushbu mavsumda "qizil iblislar" chempionlik uchun kurashishi kerak edi. Ammo bunday bo‘lmayapti. Erik ten Xag jamoasi o‘tgan mavsum kabi so‘nggi ikki oyda sust start namoyish etdi. Oqibatda, mankunianliklar bu davrni asosan turnir jadvalining ikkinchi qismida o‘tkazishga majbur bo‘ldi.
Superkompyuterning yangi hisob-kitoblariga ko‘ra, "Manchester Yunayted" uchun ushbu mavsum so‘nggi 34 yildagi eng yomoni bo‘ladi. Xalqaro tanaffuslardan ilgari sun’iy ongning taxminlarida "MYU" APLning oltinchi pog‘onasida qolishi kerak edi. Garchand sakkizinchi tur "Sheffild Yunayted"ga qarshi qiyin g‘alaba bilan yakunlangan bo‘lsa ham, Erik ten Xag shogirdlarining imkoniyatlari yanada pastladi. Hozir ular 38 turdan keyin 9 o‘rinni egallashi mumkin xolos. Ushbu bashoratda ma’lumotlar superkompyuter tomonidan 100 ming marta qayta ishlandi. Bunda kompyuter, o‘tgan mavsumdagi natijalar, jamoalarning joriy sport formasi hamda xG (expected Goals) ko‘rsatkichlariga qarab xulosa qilgan. Oqibatda, mavsumni "qizil iblislar" to‘qqizinchi pog‘onada, "Chelsi" va "Brayton"dan bir ochko kam to‘plagan holda yakunlashi ma’lum bo‘ldi.
Aytish kerakki, "Manchester Yunayted" mavsum oxirida 34 yildan beri bunchalik pastki o‘rinlarga tushib ketmagan. Oxirgi marta bu jamoa 1989/90 yilgi mavsumni 13 pog‘onada yakunlagandi. 2023/24 yillarning dastlabki 7 ta turida "Tottenxem", "Arsenal", "Brayton" va "Kristal Pelas"dan mag‘lubiyatlar qabul qilib olindi. "Tig‘chilar"ga qarshi uch ochko olingach, "MYU" sakkizinchi o‘ringa chiqdi. Ammo hozirga qadar turnir jadvalining yuqori o‘ntaligidagi birorta jamoa mag‘lub etilgani yo‘q. Superkompyuter esa "qizil iblislar"ni mavsumning qolgan qismida yana 9 mag‘lubiyat kutib turibdi deb hisoblaydi. Oqibatda, jamoa kuchli to‘rttalik tugul, yevrokuboklar zonasidan ham chiqib ketadi, 4 o‘rin bilan ochkolar farqi 12 tani tashkil etadi.
Yuqori o‘rinlarga keladigan bo‘lsak, "Nyukasl" yana YECHLga yo‘llanma olishi kutilmoqda. "Manchester Siti" esa doimgidek chempionlikka erishadi. Sun’iy ong ikkinchi o‘rinni "Arsenal" egallaydi deb hisoblaydi. To‘pchilardan bir ochko kam to‘plagan "Liverpul" esa keyingi pog‘onadan joy oladi. Pastki yevrokuboklar uchun "Tottenxem", "Aston Villa" va "Brayton" loyiq ko‘rilgan. APLni esa "Sheffild Yunayted", "Luton Taun" va "Bornmut" tark etadi.
Jaloliddin ISMATOV tarjimasi
