Joze Mourinyo A Seriyaning bitta o‘yiniga diskvalifikasiya qilindi.

Eslatib o‘tamiz, "Roma" ustozi "Monsa"ga qarshi o‘yinning 101-daqiqasida (1:0) qizil kartochka olgan edi. Uchrashuv so‘ngida "Monsa" yarim himoyachisi Matteo Pessina to‘p tashlab beradigan bolakay unga to‘pni juda uzoqda berayotganidan shikoyat qildi. Buni ko‘rgan portugaliyalik murabbiy yig‘layotgandek imo-ishora qilib, raqib futbolchisiga taqlid qildi. Buning uchun bosh hakam Jovanni Ayroldi Mourinyoni maydondan chetlatdi.

Ijro-intizom qo‘mitasi Mourinyoni A Seriyaning bir o‘yiniga diskvalifikasiya qilishga qaror qildi – u "Inter"ga qarshi o‘yinda jamoani boshqara olmaydi.

Portugaliyalik murabbiyning yordamchisi Nunu Santush ham diskvalifikasiya qilindi - u "raqib zaxira o‘yinchilariga nisbatan provokasion xatti-harakatlar ko‘rsatdi; qoidabuzarlik to‘rtinchi hakam tomonidan aniqlandi.

A Seriyaning 10-turidan o‘rin olgan “Inter” – “Roma” uchrashuvi 29 oktyabr kuni bo‘lib o‘tadi.