Joriy mavsumda muxlislarini yoqimli g‘alabalari bilan quvontirayotgan “Andijon” jamoasi chempionatning qolgan 4 ta o‘yinida ham maksimal ochko to‘plashni maqsad qilib qo‘ygan.

“Burgutlar” ayni chog‘da 22-turdan keyin musobaqa jadvalida 34 ochko bilan 6-o‘rinni band etib turibdi. Ma’lumot uchun, jamoa ortda qolgan uchrashuvlar mobaynida 10 g‘alaba, 4 durang hamda 8 mag‘lubiyat qayd etdi. To‘plar nisbati esa hozircha 23\20 andijonliklar foydasiga.

Bosh murabbiy Aleksandr Xomyakov va uning shogirdlari chempionatdagi intriganing yanada qizishiga katta hissa qo‘shayotganliklari e’tiborga molik. Chunki “Andijon” raqobatbardoshlikni ancha oshirdi va maqsadi sari intilishdan to‘xtamayapti.

Yana bir e’tiborga molik jihati shundaki, “Andijon” ortda qolgan 13 ta o‘yinni xuddi chempionlarga xos tarzda o‘tkazib kelmoqda. Bu borada klub boshqalardan ko‘ra eng ko‘p ochko jamg‘argan jamoa bo‘lib turibdi – 25 ochko. Faqatgina “Paxtakor” ham ortda qolgan 13 ta bahsda 25 ochko to‘plagan. Aytish joizki, bu borada
“Andijon” bilan “Paxtakor” boshqalardan oldinda. Bundan xulosa qilish mumkinki, jamoamiz 13 ta o‘yindagi natijalardan kelib chiqilsa, chempionatni chempionlarcha o‘tkazayotganini ko‘rish mumkin.

“Andijon”da shunday imkoniyatki, mavsumni yanada yuqori pog‘onalardan birida yakunlashi ham mumkin. Klubning eng yaxshi natijasi hozirgacha 5-o‘rin bo‘lgan. “Burgutlar” o‘z parvozida yana ushbu natijani bosib o‘tishi va hatto tarixni yangilagan holda birinchilikda o‘zining eng yuqori o‘rnini qayd etishi ham mumkin. Muhimi, bu borada jamoada imkoniyat bor. So‘nggi 13 ta uchrashuvni chempionlarga xos tarzda o‘tkazgan futbolchilar barchada iliq taassurot qoldiryapti va mana shunday g‘olibona ruhning ta’sirida qolgan bellashuvlarda ham o‘zining suyukli muxlislarini xursand qila oladilar.

"Andijon"ning navbatdagi o‘yini 28 oktyabr kuni “Bobur Arena”da OKMKga qarshi bo‘lib o‘tadi.