Yevro-2024 saralashi 8-turidan o‘rin olgan Gresiya - Niderlaniya o‘yiniga e’tibor juda kuchli edi.
Agar yunonlar o‘z maydonlarida g‘alaba qozonishganida kelasi yili Germaniyada bo‘ladigan qit’a chempionati tomon katta qadam tashlardilar. O‘z navbatida, mag‘lubiyat emas, hattoki, durang ham Ronald Kuman shogirdlarini Yevro-2024 tomoshabiniga aylantirardi katta ehtimol.
Gresiya - Niderlaniya o‘yini davomida yunonlar o‘z jamoalari ijobiy natijaga erishishiga hissa qo‘shish uchun imkoni boricha harakat qilishdi, ammo hammasi zoye ketdi. Mehmonlar Virjil van Deykning 90+3-daqiqada penaltidan urgan yagona goli evaziga ortga g‘alaba bilan qaytishdi. Shu tariqa «V» guruhidagi holat mavhumligicha qoldi: oxirgi tur oldidan Niderlandiya va Gresiya termalari ochkolari soni tenglashdi (12tadan).
O‘yindagi bitta holat ko‘pchilik e’tiboridan chetda qolmadi, albatta. Virjil van Deyk penalti tepishga chog‘langan pallada gresiyalik muxlislar unga lazer nurini to‘g‘rilash va kuchli hushtakbozlik vositasida xalaqit berishga urinishdi. Lekin «Liverpul» himoyachisi bundan esankirab qolmadi va penaltini sovuqqonlik bilan golga aylantirdi. Xullas, yunonlarning barcha urinishlari besamar ketdi. Tabiiyki, endi ijtimoiy tarmoqlarda Virjil van Deykni rosa maqtashmoqda:
- Gresiyalik fanatlar van Deykni lazer nurlari bilan qo‘rqitmoqchi bo‘lishdi, lekin bu hiylalari ish bermadi.
- Virjil Van Deyk. 93-daqiqa. Xotirjam va e’tiborli. Lazerlar bu xotirjamlikni buzishga yetarli emas.
- Van Deyk qoyilmaqom zarba bilan gresiyalik muxlislar qalbini parchaladi. Bu - lazer nuri yordamida uni chalg‘itishni o‘ylaganlarga qaratilgan zarba!
- Van Deyk - o‘yin qahramoni. 93-daqiqa, safar o‘yini, ko‘ziga to‘g‘rilangan lazer nurlari, haqorat va shovqin. Muhimi, futbolchida gol urishiga zarracha shubha yo‘q edi.
