Eronning "Nassajiy Mozandaron" klubi bosh murabbiyi Mahdiy Rahmatiy "Navbahor"ga qarshi bo‘lib o‘tgan uchrashuvdan so‘ng o‘z fikrlari bilan o‘rtoqlashdi.

"Birinchi bo‘limda o‘tkazib yuborilgan 2 gol ahvolimizni qiyinlashtirib qo‘ydi. Shunga qaramay, o‘yinga qaytishga muvaffaq bo‘ldi va gol urish uchun 2 ta vaziyatga ega bo‘ldik. Ikkinchi taymda yo‘l qo‘ygan xato tufayli yana gol o‘tkazib yubordik va vaziyat og‘irlashib ketdi.

"Navbahor" yaxshi jamoa hisoblanadi. Bu jamoa bir necha yillardan buyon O‘zbekiston chempionatida ishtirok etib kelmoqda. Biz esa hali yosh jamoa hisoblanamiz.

Yo‘l qo‘yilgan xatolar va mag‘lubiyat uchun mas’uliyatni o‘z zimmamga olaman. Osiyo chempionlar ligasidagi ilk ishtirokimizda faqat tajriba to‘playapmiz. Jamoamizga vaqt kerak. Oldimizda transfer vaqtida tarkibni kuchaytirishimiz kerak.

Bundan tashqari, zich taqvim ostida o‘ynayotganimiz ham bizga qiyinchilik tug‘dirmoqda. Biz har 3-4 kunda maydonga ttushyapmiz. Masalan, "Navbahor" bilan safarda o‘ynab qaytganimizdan keyin 4 kun o‘tib "Sepahon" bilan, oradan yana 3 kun o‘tib "Traktor" bilan o‘ynadik. Endi esa "Navbahor" bilan o‘ynadik. Futbolchilarning tiklanishi uchun vaqt kerak", — dedi Rahmatiy.