Saudiyaning "Al Ittihad" jamoasi bosh murabbiyi Nunu Eshpiritu Santu o‘z xohishi bilan klub rahbariyatidan iste’fo so‘ragan.

OCHL 4-turida Iroqning "Al Quva al Javiya" jamoasidan uchralgan mag‘lubiyatdan so‘ng, portugaliyalik murabbiy va jamoa sardori Karim Benzema kiyim almashtirish xonasida tortishib qolishgan. Ma’lumotlarga ko‘ra, Benzema anchadan beri xuddi Ronaldu kabi jamoaga "o‘z murabbiyi"ni olib kelish niyatida bo‘lgan.

Ronaldu "An Nassr"ga kelgach, biroz vaqt o‘tib, bosh murabbiy Rudi Garsiya o‘rniga portugaliyalik Luish Kashtruni olib kelgan edi. Benzema olib kelmoqchi bo‘lgan murabbiylar orasida fransiyalik Loran Blan va hattoki Zinedin Zidan nomi ham tilga olinmoqda.

Nunu Santu o‘tgan mavsumda jiddaliklarni 14 yillik tanaffusdan so‘ng Saudiya chempioniga aylantirgan edi. OCHLda esa "Al Ittihad" o‘z guruhida to‘rt turdan so‘ng, 9 ochko bilan yakka peshqadam bo‘lib turibdi.

Dekabr oyida Klublar o‘rtasidagi Jahon chempionatida qatnashadigan "Al Ittihad"ni nufuzli musobaqaga boshqa bir nomdor murabbiy tayyorlashi ma’lum qilingan. "Al Ayn" jamoasining niderlandiyalik murabbiyi Alfred Sxryoder jiddaliklar bilan muzokaralar olib borayotgani haqidagi xabarlarni inkor etdi.