Madridning “Real” klubi yarim himoyachisi Arda Gyuler “Valensiya”ga qarshi o‘yin oldidan jarohat oldi.
The Athletic jurnalisti Gilyermo Rai xabariga ko‘ra, 18 yoshli futbolchining o‘ng sonining to‘rt boshli mushaklari yirtilgan. Manbaga ko‘ra, turkiyalik yarim himoyachining tiklanishi taxminan bir oy davom etadi.
Gyuler iyul oyida "Fenerbaxche"dan "Los Blankos" jamoasiga qo‘shilgandi. Eslatib o‘tamiz, u yaqinda jiddiy jarohatidan forig‘ bo‘lib, jamoa bilan bir qator mashg‘ulotlar o‘tkazdi, ammo "Real"da debyut o‘tkaza olmadi.
"Real Madrid"ning navbatdagi o‘yini 11 noyabr kuni bo‘lib o‘tadi. Karlo Anchelotti shogirdlarining La Liganing 13-turidagi raqibi "Valensiya" bo‘ladi.
