"Yuventus" hozirda "Atletiko"da o‘ynayotgan hujumchi Alvaro Morataning safga qaytishiga qiziqmoqda. Bu haqda jurnalist Daniele Longo xabar bermoqda.

Qayd etilishicha, "Atletiko" bilan shartnoma uzaytirilishi bunga xalaqit berishi mumkin. Yozda 31 yoshli ispaniyalik futbolchi boshqa jamoaga o‘tishga yaqin turgandi, biroq mavsum boshidagi muvaffaqiyatli o‘yinlaridan so‘ng madridliklar rahbariyati bilan munosabatlari mustahkamlandi.

Forvardning amaldagi shartnomasi kelasi yozda yakuniga yetadi.

Morata bungacha ikki marta "Yuventus"da o‘ynagan - 2014 yilda u "Real"dan 20 million yevroga sotib olingan, 2020 yilda esa "Atletiko"dan ikki yilga ijaraga olingan.

Joriy mavsumda Alvaro 14 ta o‘yin o‘tkazib, 12 ta gol va 3 ta golli uzatmani amalga oshirdi.