"Real Madrid" prezidenti Florentino Peres Chempionlar ligasining yangi formatini tanqid qildi.

"UYEFA rahbariyati noto‘g‘ri yo‘nalishda ketmoqda. Ularning Chempionlar ligasining yangi modelida ko‘proq o‘yinlar va kamroq hayajon bo‘ladi. Bu bema’ni raqobat. Muxlislar talabi, futbolchilarning talabi, klublar talabini inobatga olishmayapti.

UYEFA innovasiyalar kiritmaydi va rivojlanishda davom etayotgan boshqa sport turlari, birinchi navbatda, Amerika sportlari tahdidiga qanday qarshi turishni bilmaydi. Biz ko‘plab yirik korporasiyalar misollarini ko‘rdik, ular daxlsiz bo‘lib tuyuldi, lekin ular moslasha olmagani uchun qulab tushdi.

Superliga loyihasi boshida "Real Madrid" bo‘lmaganida qulayroq bo‘lardi, lekin buni bizdan tarix talab qilmoqda. Men Yevropa Ittifoqi adliya tizimiga ishonaman. Menimcha, UYEFA Yevropa futbolida monopoliyaga ega bo‘lmasligi kerak. 21 noyabr kuni Superliga ishidagi qarorni bilib olamiz, futbolning kelajagi bunga bog‘liq. Umid qilamizki, 21 noyabr futbolda yangi davrning boshlanishi bo‘ladi", - dedi Peres ESPN nashri bilan suhbatda.

Oldinroq UYEFA Chempionlar ligasining kelasi mavsum uchun taqvimini yangilangan formatda elon qilgan edi.