O‘zbekiston Kubogi finali yakuniga yetgach, mezbonlar bosh murabbiyi Ro‘ziqul Berdiyev o‘yin haqidagi fikrlari bilan o‘rtoqlashdi.

"Bugun o‘z muxlislarimizni Kubok bilan xursand qilganimizdan mamnunmiz. Bundan o‘zimiz ham xursandmiz. O‘zbekiston Kubogi finali doirasida o‘z maydonimizda ilk bor o‘ynadik. O‘z muxlislarimiz ko‘z o‘ngida kubokni qo‘lga kiritish juda yoqimli. Bundan boshqacha bo‘lishi ham mumkin emasdi. Bugun qiyin o‘yin o‘tkazdik. Chunki, raqimizda ancha tajribali hisoblanadi. Birinchi bo‘limda o‘ynimiz unchalik o‘xshamadi, lekin ikkinchi bo‘limda o‘z harakatlarimiz bilan o‘yin tizginini o‘zgartira oldik.

- O‘yindan oldin futbolchilarga qanday motivasiya berdingiz?

- O‘yindan oldin qanchalik motivasiya bermaylik, o‘zlariga bo‘lgan ishonchni ortirmaylik, baribir birinchi bo‘limda bosimda ostida o‘ynayotganligi sezilib qoldi. Futbolchilarga bosim o‘ynash haqida juda ko‘p marta aytdik, lekin baribir ruhiy tomondan bu narsa uchrab turadi. Ikkinchi bo‘limda vaziyatni o‘zgartirishga erishdik. Albatta, bu juda yoqimli. Chunki, biz uchinchi marta O‘zbekiston Kubogini qo‘lga kiritdik. Bu muxlislarimiz uchun ajoyib sovg‘a bo‘ldi. Jamoamizning qanchalik o‘sganini, barqaror o‘yin namoyish etayotganini mana shunday kubok o‘yinlari ko‘rsatib turibdi.

- Mashg‘ulotlarda penalti tepish borasida futbolchilar alohida shug‘ullanadimi?

- So‘nggi uchta mashg‘ulotimizda mana shu narsa bilan ko‘p shug‘ullandik. Bungacha ham Javohir (Siddiqov) penaltilarni ko‘p amalga oshirar edi. Bugun ham ishonch bilan tepdi. O‘yinning muhim pallasida u sovuqqonlik bilan harakat qildi.

Bugungi g‘alaba bilan barcha muxlislarimizni tabriklayman. Barcha g‘alabalarimiz ularniki" - dedi Berdiyev.