Erik ten Xag joriy mavsumdagi yomon natijalar sababli bosim ostida qolmoqda. Ammo uning "MYU"dagi umumiy natijasi yomon emas. Niderlandiyalik mutaxassis birinchi mavsumni ajoyib ravishda o‘tkazib, jamoani sovrin sari boshlagandi. Shuningdek, aynan u "MYU"ni Angliya kubogi finaliga olib chiqdi. Bu natijalar, o‘z navbatida ten Xagdan yanada ko‘proq narsalar kutilishiga olib keldi. Afsuski, bu kutilmalar hozircha o‘zini oqlayotgani yo‘q. "Fulxem" va "Luton Taun"ga qarshi erishilgan og‘ir g‘alabalar jamoani pastga tushib ketishdan asrab qoldi. Biroq, o‘yin tomonlama ten Xag jamoasini zavqli deb bo‘lmaydi. Kubok va YECHL doirasidagi bahslar jamoa uchun omadsiz kechayotgani ham hammasini ko‘rsatib turibdi. Natijalar zudlik bilan yaxshilanishi lozim.

Erik ten Xag hozirga qadar 50 ta APL o‘yinida mankunianliklarni maydonga boshlab tushdi. Agarda shu davrdagi natijalarga qaraydigan bo‘lsak, unchalik ham yomon statistikani ko‘rmaymiz. "MYU" 50 ta o‘yin davomida 30 ta g‘alabaga erishdi. Bu esa Aleks Fergyusonning natijasi bilan teng. 1992/93 yilgi va undan keyingi mavsumlar "Manchester Yunayted" uchun chempionlik bilan tugaganini hisobga olsak, ten Xag ancha yaxshi ko‘rsatkichga ega ekani ma’lum bo‘ladi. Ammo bir tomondan, Fergyuson bu davrgacha allaqachon jamoada 200 ta bahs o‘tkazganini ham unutmaslik kerak.

Bugun Erik ten Xagni APLning qolgan uchta eng yirik raqib klub murabbiylari bilan solishtirib ko‘ramiz. Ular Angliyadagi eng yaxshi mutaxassislar sifatida e’tirof etiluvchi Pep Gvardiola, Yurgen Klopp hamda Mikel Artetadir.
Xususan, ten Xag va Gvardiolaning o‘z jamoalaridagi ilk 50 ta bahsida farq, asosan ochkolarda. Gvardiola ham ten Xag kabi "Man Siti"dagi ilk mavsumini 3 o‘rinda tugatadi, ammo 3 ochkoga ko‘proq jamg‘argan holda.
Bu borada Klopp bilan farq juda kam va bu niderlandiyalik foydasiga. Artetadan esa ten Xagning natijalari anchagina yaxshi. Demak, quyida aniq raqamlarga e’tiboringizni qaratamiz.

Erik ten Xag – 50 ta bahs
G‘alaba – 30 ta
Durang – 6 ta
Mag‘lubiyat – 14 ta
Ochko: 96
Gollar: 71 ta
Quruq o‘yinlar: 21 ta

Ser Aleks Fergyuson – 50 ta bahs
G‘alaba – 30 ta
Durang – 13 ta
Mag‘lubiyat – 7 ta
Ochko: 103
Gollar: 82 ta
Quruq o‘yinlar: 23 ta

Yurgen Klopp – 50 ta bahs
G‘alaba – 26 ta
Durang – 14 ta
Mag‘lubiyat – 10 ta
Ochko: 92
Gollar: 103 ta
Quruq o‘yinlar: 14 ta

Pep Gvardiola – 50 ta bahs
G‘alaba – 34 ta
Durang – 10 ta
Mag‘lubiyat – 6 ta
Ochko: 112
Gollar: 119
Quruq o‘yinlar: 19 ta

Mikel Arteta – 50 ta bahs
G‘alaba – 21 ta
Durang – 12 ta
Mag‘lubiyat – 17 ta
Ochkolar: 75
Gollar: 72
Quruq o‘yinlar: 15 ta.

ISMATOV J.