"Las-Palmas"ning istiqbolli yarim himoyachisi Alberto Moleyro o‘zini "Barselona"da sinab ko‘rmoqchi ekanligini tan oldi.

Sentyabr oyida 20 yoshini nishonlagan ispaniyalik futbolchi 2022 yildayoq Kataloniya klubida o‘ynashi mumkin edi, biroq kelishuv barbod bo‘ldi. Hujumkor yarim himoyachining o‘zi kelajakda "Barselona"ga o‘tishni orzu qilishini ochiq aytdi.

"Men o‘zimni "Barselona" muxlisi deb atashim mumkin va bir kun kelib shu klubda bo‘lishni xohlayman", - deya Moleyroning so‘zlarini keltiradi Football Espana.

Futbolchi joriy mavsumda beshta o‘yinda ikkita gol urdi va bitta golli uzatmani amalga oshirdi - u jarohati tufayli mavsum boshlanishini o‘tkazib yubordi.

Transfermarkt portali Alberto Moleyroning narxini 5 million yevroga baholamoqda.