"Лас-Пальмас"нинг истиқболли ярим ҳимоячиси Альберто Молейро ўзини "Барселона"да синаб кўрмоқчи эканлигини тан олди.
Сентябрь ойида 20 ёшини нишонлаган испаниялик футболчи 2022 йилдаёқ Каталония клубида ўйнаши мумкин эди, бироқ келишув барбод бўлди. Ҳужумкор ярим ҳимоячининг ўзи келажакда "Барселона"га ўтишни орзу қилишини очиқ айтди.
"Мен ўзимни "Барселона" мухлиси деб аташим мумкин ва бир кун келиб шу клубда бўлишни хоҳлайман", - дея Молейронинг сўзларини келтиради Football Espana.
Футболчи жорий мавсумда бешта ўйинда иккита гол урди ва битта голли узатмани амалга оширди - у жароҳати туфайли мавсум бошланишини ўтказиб юборди.
Transfermarkt портали Альберто Молейронинг нархини 5 миллион еврога баҳоламоқда.
