Turkmaniston terma jamoasi daraja jihatdan O‘zbekiston bilan tenglasha olmasligiga hech qanday shubha yo‘q.

Ammo, turkmanlar o‘z maydonida Osiyoning istalgan terma jamoasiga bosh og‘riq bo‘la olishadi. JCH-2018 saralashida Eron bilan 1:1 hisobidagi durang so‘zimizning isboti bo‘la oladi. Ayniqsa, O‘zbekiston terma jamoasiga qarshi o‘yinlar Turkmaniston uchun derbi maqomida kechadi va qo‘shnilarimiz ortiqcha qo‘polligi bilan ajralib turishadi.

Bugungi uchrashuvda Turkmaniston terma jamoasi chuqur himoyadan harakat qilishini taxmin qilish qiyin emas. Faqatgina o‘yinning boshida o‘z muxlislari qarshisida biroz bosim qilishga harakat qilishi mumkin. O‘yinning kolgan qismida raqiblarimiz qarshi hujumdan o‘z imkoniyatlarini kutishadi. Raqibning asosiy va yagona quroli bu - uzoq masofadan beriladigan zarbalar. Chunki terma jamoa safida tajribali Arslanmurad Amanov, Elman Tagayev va Ruslan Mingazov kabi ijrochilar yig‘ilgan.

Turkmanistonning so‘nggi o‘yinlarini kuzata turib, himoyaning so‘nggi liniyasi yuqori o‘ynagan holda, sun’iy o‘yindan tashqari holat tuzog‘ini yaratishga harakat qilishini ko‘rish mumkin. Bunday holatlarda tezkor Shomurodov yoki vingerlarimizga havolatib beriladigan uzun paslar - ularning yakkama-yakka vaziyatga qochib ketishlariga zamin yaratishi mumkin.

Turkmanistonning yana bir kuchsiz tomoni - bu standart vaziyatlardagi palapartish himoyalanishidir. Burchak va jarima zarbalari paytida, bo‘ydor markaziy himoyachilarimiz bu nuqsondan unumli foydalanishlari mumkin.

P.S. Raqib jamoa tahlili - raqibdan qo‘rqqandan emas, balki har bir raqibni jiddiy qabul qilgan holda, futbolchilarning hushyorligini oshirish uchun amalga oshiriladi.