Adidas kompaniyasi Lionel Messini 8-«Oltin to‘p» bilan alohida tabrikladi.
Germaniya brendi bu borada kreativ yo‘ldan borib, argentinalik uchun original sovg‘a hozirladi - 8ta uzuk. Kreativlik shuki, maxsus buyurtma asosida tayyorlangan taqinchoqlarning har biri Leoga qaysidir alohida muvaffaqiyati yoki harakatini eslatib turadi. Adidas vakillaridan ajoyib yurish!
Leoning 8ta uzukni taqib olgan holda tushgan suratlari birinchi bo‘lib, Adidas kompaniyasining ijtimoiy tarmoqlardagi rasmiy sahifalarida paydo bo‘ldi. Tabiiyki, ular bir zumda butun internet olamiga ham keng tarqaldi. Har bir uzukning Messi faoliyatidagi qaysidir muhim voqeaga bag‘ishlangani e’tiborga molik:
El Beso - Messining CHLdagi birinchi g‘alabasi (2009 yili) sharafiga
Apunta Al Cielo - Messining gollarni qo‘llarini osmonga qarata nishonlashi sharafiga (Leo 1998 yili vafot etgan buvisi Selinani shunday xotirlagandi).
GOAT - Xosep Gvardiola boshqaruvida o‘ynagan 2011 yilgi «Barselona» sharafiga
91 - 2012 yili Messi o‘rnatgan tarixiy rekord (u yil davomida 91ta gol urgandi) sharafiga
Shuningdek, CHLdagi 4ta g‘alaba, 6ta «Oltin butsa», Amerika kubogi-2021dagi zafar va albatta, Argentina milliy jamoasining JCH-2022dagi chempionligi sharafiga atalgan uzuklar bor.
Adidas uzuklar to‘plami bilan cheklanib qolmay, 8-«Oltin to‘p»ga atab maxsus butsalar (cheklangan miqdorda)ni ham sotuvga chiqardi. Ular noyob dizayni bilan ajralib turadi. Oq-oltin tusli butsalarning bir tomonida 8ta «Oltin to‘p» tasviri, Argentina bayrog‘i, Messining o‘yinchilik raqami va GOAT yozuvi bor. Eng muhimi, butsalarning ikkinchi tomoni Messi oilasiga bag‘ishlangan: farzandlari va turmush o‘rtog‘ining ismlari, tug‘ilgan sanalari. Insayderlarning yozishlaricha, Leo yaqin orada shu butsada o‘ynay boshlaydi. Yangi modelning nomi ham jarangdor - AdidasxCrazyfast.1 Messi Ballon D’or.
