"Real" yozda o‘zining eng katta maqsadlaridan biri bo‘lgan Jud Bellingemni sotib olishga muvaffaq bo‘ldi. Ammo reja shu bilan to‘liq bajarilgani yo‘q. O‘tgan mavsumda na La-liga va na YECHL qo‘lga kiritildi. Shu sabab kattaroq va ko‘proq futbolchilar olib kelinishi kerak edi. Quyida "qirollik klubi"ning yetisha olmagan nishonlariga e’tiboringizni qaratamiz.
Kilian Mbappe
O‘tgan yoz ham boshqalari kabi Mbappe muammosi bilan kechdi. Ammo fransiyalik hujumchi yana Parijda qolishga majbur bo‘ldi. U "PSJ" bilan shartnomasini ortiq uzaytirmasligini bildirgandi. Bu esa ko‘pchilikda "Real" maqsadiga erishadi degan xulosaning shakllanishiga olib keldi. Afsuski, hali bunday bo‘lgani yo‘q. Nima bo‘lishini esa keyingi yozda bilib olamiz.
Gabri Veyga
Veyganing Saudiya Arabistoniga 21 yosh bo‘la turib ketib qolishi, Toni Kroos tomonidan tanqid ostiga olingandi. Nemis yarim himoyachisi bu holatga "uyatli" deya ta’rif beradi. Veyga ispan futbolining kelajagi sifatida qaralayotgandi. "Selta" tarkibida yarim himoyachining o‘yinlari yorqin ko‘rindi. Ammo, hozir u "Al-Ahli" bilan yetarli o‘yin amaliyotiga ega bo‘la olmayapti.
Gonsalu Inasiu
Portugaliyalik markaziy himoyachi "Sporting" akademiyasidan chiqqan javohirlardan biridir. Inasiu hozirgacha jamoasi uchun yuzdan ortiq bahslarda ishtirok etdi. Unda Yevropaning eng yaxshisi bo‘lishi uchun hamma narsa mavjud. "Real" 22 yoshli futbolchini yozdayoq o‘ziniki qilmoqchi edi. Biroq, Inasiu qolishga qaror qildi. Ayni damda unga "Liverpul", "MYU" hamda "Nyukasl" jiddiy qiziqish bilan qaramoqda. Inasiuning tovon puli 60 million funtga teng.
Alfonso Devis
David Alaba "Real"ni Alfonso Devis xaridiga undagani haqida xabarlar mavjud edi. Haqiqatdan ham madridliklar Kanada terma jamoasi a’zosiga qiziqish bildirgan. 23 yoshli himoyachining amaldagi bitimi 2025 yilda yakun topadi. Keyingi yozda Alfonso o‘z taqdirini hal qilishi kerak. Xabarlarda, uning o‘zi "Real"ni ma’qul ko‘rayotgani aytilgan.
David De Xea
De Xeaning "Real"ga o‘tishi kerakligi haqidagi gaplardan keyin, oradan sakkiz yil o‘tdi. Yozda De Xea erkin agent edi. Ammo bu imkoniyatdan Anchelotti foydalanmadi. Kurtua safdan chiqqach, De Xea qisqa muddatli shartnoma bilan olib kelinishi kerak bo‘lgan. Biroq, "Real" Kepa Arrisabalagani tanladi. Shu sabab 33 yoshli De Xea haligacha erkin agent maqomida qolmoqda. Unga hozir AQSH va Saudiya Arabistoni klublaridan takliflar bo‘lmoqda.
ISMATOV J.
