Qarshining "Nasaf" klubi OCHL 5-turida o‘z maydonida Iordaniyaning "Al-Faysaliy" jamoasini qabul qiladi. Ushbu bahsdan avval qarshiliklar bosh murabbiyi Ro‘ziqul Berdiyev hamda yarim himoyachi Javohir Sidiqov matbuot anjumanida ishtirok etishdi.

Ro‘ziqul Berdiyev: Chempionlar ligasi guruh bosqichida hal qiluvchi palla boshlandi. Mavsum avvalidayoq maqsad sifatida keyingi bosqich yo‘llanmasi qo‘yilgan edi. Ertaga ham faqat g‘alaba uchun maydonga chiqamiz. Taqvim tig‘izligiga allaqachon ko‘nikib bo‘ldik. Siz xalqaro maydonda o‘ynashni xohlasangiz, shunday bo‘lishi tabiiy. Muhimi, barcha yigitlar bo‘lajak o‘yinga shay holatda. Faqatgina diskvalifikasiya tufayli Alibek Davronovning xizmatidan foydalana olmaymiz.

Raqib Iordaniyaning eng kuchli jamoasi va faqat tajribali o‘yinchilardan tuzilgan. Ularning "Sharja" va "As Sadd" jamoasidan farqi bitta futbolchiga bog‘lanib qolmagan. Shuningdek, jismoniy jihatdan juda yaxshi shakllangan. Bu jamoani yengish uchun katta mehnat qilishimiz kerak bo‘ladi.Muxlislarning qo‘llab-quvvatlashi jamoaga kuch beradi. Ertaga ham stadionda ajoyib atmosfera bo‘ladi degan umiddamiz.

Javohir Sidiqov: Bizni muhim bahs kutib turibdi. Jamoa yaxshi formada, yigitlarning kayfiyati yuqori. Xudo xohlasa, ertaga g‘alaba bilan Qashqadaryo ahlini xursand qilishga urinamiz.