Madridning «Real» klubi yozgi transfer oynasi 1 sentyabr, seshanba kuni yopilguniga qadar boshqa futbolchi xarid qilmaydi. Bu haqda jurnalist Xose Feliks Dias xabar berdi.

Bu qaror yarim himoya va markaziy himoya chizig‘ini kuchaytirish bo‘yicha davom etayotgan mish-mishlarga qaramay qabul qilingan.

«Real» avvalroq yana bir yarim himoyachi hamda chap oyoqda o‘ynaydigan markaziy himoyachini tarkibga qo‘shish imkoniyatini o‘rganib chiqqan. Rodri va Alessandro Bastoni ustuvor nomzodlar sifatida tilga olingan edi. Biroq transfer oynasi yopilguniga qadar bu pozisiyalarning hech biri kuchaytirilmaydi.

Madridliklar bu yozda Mark Kukurelya, Ibraima Konate, Bernardu Silva, Denzel Dumfris va Yan Diomandeni o‘z safiga qo‘shib oldi. Diomande bonuslar bilan birga 140 million yevrogacha bo‘lgan summa evaziga kelib, klub tarixidagi eng qimmat transferga aylandi.

Shuningdek, «Real» «Rasing Santander»dan 19 yoshli yarim himoyachi Serxio Martinesni ham xarid qildi. Dastlab u «Kastilya» tarkibida rivojlanishi kutilmoqda.

Shu bilan birga, transfer oynasi yopilguniga qadar jamoadan ketishlar hali ham bo‘lishi mumkin. Eduardu Kamavingaga Angliya Premyer-ligasi klublari qiziqish bildirmoqda, ammo futbolchi hozircha ketishni istamayapti.

Raul Asensio ham transferga qo‘yilgan, biroq u ham Ispaniyadan ketishga shoshilmayapti.