Қаршининг "Насаф" клуби ОЧЛ 5-турида ўз майдонида Иорданиянинг "Ал-Файсалий" жамоасини қабул қилади. Ушбу баҳсдан аввал қаршиликлар бош мураббийи Рўзиқул Бердиев ҳамда ярим ҳимоячи Жавоҳир Сидиқов матбуот анжуманида иштирок этишди.
Рўзиқул Бердиев: Чемпионлар лигаси гуруҳ босқичида ҳал қилувчи палла бошланди. Мавсум аввалидаёқ мақсад сифатида кейинги босқич йўлланмаси қўйилган эди. Эртага ҳам фақат ғалаба учун майдонга чиқамиз. Тақвим тиғизлигига аллақачон кўникиб бўлдик. Сиз халқаро майдонда ўйнашни хоҳласангиз, шундай бўлиши табиий. Муҳими, барча йигитлар бўлажак ўйинга шай ҳолатда. Фақатгина дисквалификация туфайли Алибек Давроновнинг хизматидан фойдалана олмаймиз.
Рақиб Иорданиянинг энг кучли жамоаси ва фақат тажрибали ўйинчилардан тузилган. Уларнинг "Шаржа" ва "Ас Садд" жамоасидан фарқи битта футболчига боғланиб қолмаган. Шунингдек, жисмоний жиҳатдан жуда яхши шаклланган. Бу жамоани енгиш учун катта меҳнат қилишимиз керак бўлади.Мухлисларнинг қўллаб-қувватлаши жамоага куч беради. Эртага ҳам стадионда ажойиб атмосфера бўлади деган умиддамиз.
Жавоҳир Сидиқов: Бизни муҳим баҳс кутиб турибди. Жамоа яхши формада, йигитларнинг кайфияти юқори. Худо хоҳласа, эртага ғалаба билан Қашқадарё аҳлини хурсанд қилишга уринамиз.
