Angliya futboli tarixida shunday davr bo‘lganki, terma jamoada fantastik yulduz hujumchilar harakat qilgan. Hozirgi davr haqida esa bunday deb bo‘lmaydi. Garet Sautgeyt ixtiyorida unchalik ham katta tanlov imkoniyati mavjud bo‘lmasada, yarq etib ko‘zga tashlangan nomlar mavjud. Quyida Angliya terma jamoasi Yevro-2024 da foydalanishi mumkin bo‘lgan markaziy hujumchilarga e’tibor qaratamiz.
5. Ayvan Tauni
Tauni onlayn qimor o‘yiniga pul tikkani uchun futboldan ancha chetda qolmoqda. "Brentford" hujumchisi taqiqqa uchraguniga qadar, o‘tgan mavsum davomida 21 ta golga mualliflik qilgan. Bu esa APLda Xoland va Keyndan keyingi eng yaxshi ko‘rsatkich edi. U yanvar oyidan boshlab maydonga qaytishi mumkin bo‘ladi. Baxtga qarshi, Garet Sautgeyt unchalik ham tavakkalchi mutaxassis emas. Shu sababli Tauni boshqa terma jamoaga chaqirilmasa kerak. Xarholda, Yevropa chempionatiga qadar bunday bo‘lmaydi. Ammo 27 yoshli hujumchining talanti va darajasiga gap-so‘z bo‘lishi mumkin emas. Bekorga unga "Chelsi" qiziqish bilan qaramayapti.
4. Eddi Nektia
Eddi Nketia yaxshi darajadagi hujumchi. Ammo uning 21 yoshli terma jamoadagi to‘purarlik maqomi hech narsani anglatmaydi. Nketia hali yosh, ammo uning darajasi terma jamoadagi o‘rin uchun kurashishga yetishi so‘roq ostida qolmoqda. Ammo kerak vaqtda, u doimo Gabriel Jezus o‘rnini to‘ldirib, APLda gollar ura oladi.
3. Kallum Uilson
Uilson hozir jarohat olgani sababli maydonga tusha olmayapti. Uning o‘rnini to‘ldirgan Aleksander Isak esa "Nyukasl"ga foyda keltira olmoqda. Uilson Qatardagi mundialda Xarri Keyn o‘rnini to‘ldiruvchi vazifasini bajargan edi. Shunday ekan, u Germaniyadagi qit’a chempionatida ham bu ishni yana bir bor qilishi mumkin. Agarda o‘sha vaqtgacha hammasi joyida bo‘lsa, Uilsonda yaxshigina imkoniyat bo‘ladi.
2. Olli Uotkinz
Uotkinz bundan bor-yo‘g‘i besh yil ilgari Angliyaning beshinchi divizionida o‘ynayotgan edi. Hozir uni ko‘rgan muxlislar yuqoridagi ma’lumotga ishonishi qiyin, albatta. "Aston Villa" vakili Unai Emeri bilan o‘z jamoasi joniga oro kirmoqda. Yevrokuboklar qatnashchisi bo‘lgan klub uchun Uotkinz ko‘proq narsa taklif etishga intilmoqda. Agarda u porlashda davom etsa, Sautgeyt unga Yevro-2024 qatnashchiligini sovg‘a qilishi mumkin.
1. Xarri Keyn
Angliyaning eng muhim vakiliga ham yetib keldij. Tomas Tuxel aytganidek, Keyn Angliyaning xaloskori va uni asosiy jamoaga kiritmaslik imkonsiz ish. Haqiqatdan ham shunday. Agarda Keyn sog‘-salomat bo‘lib tursa, butun millat kelasi yozda aynan uning harakatlaridan umidvor bo‘ladi. Xarri Keyn hozirga qadar inglizlar safida barcha davrlarning eng yaxshi to‘purariga aylanib ulgurgan.
ISMATOV J.
