Krishtianu Ronaldu Florida okrug sudida jamoaviy da’voga uchradi.

Sababi "An-Nasr" hujumchisi Binance kriptovalyuta birjasini reklama qilgan.

Coin Telegraph nashrining yozishicha, 27 noyabr kuni Florida shtatidagi AQSH okrug sudiga berilgan da’voda Ronaldu "Binance bilan kelishilgan holda ro‘yxatdan o‘tmagan qimmatli qog‘ozlarni taklif qilish va sotishda rag‘batlantirgani, yordam bergani va/yoki faol ishtirok etgani" aytilgan.

Ta’kidlanishicha, platforma ro‘yxatdan o‘tmagan qimmatli qog‘ozlarga, shu jumladan Binancedagi BNBga sarmoya kiritish uchun bir qator Ronaldo NFT-tokenlarini sotib olgan foydalanuvchilarni jalb qilgan.

Shuningdek, da’vo arizasida qayd etilishicha, Ronaldu "Binance ro‘yxatdan o‘tmagan kriptovalyuta qimmatli qog‘ozlari bilan savdo qilayotganini bilishi kerak edi, chunki u tashqi maslahatchilarni jalb qilish uchun sarmoyaviy tajriba va katta resurslarga ega edi".

Da’vogarlar zararni qoplash va sud xarajatlarini qoplash uchun mablag‘ talab qilmoqda.

Avvalroq Binance pul yuvishga qarshi kurash qoidalariga rioya qilmaslik va sanksiyalarni buzganlikda aybini tan oldi va AQSH rasmiylari bilan kelishuv bitimiga erishdi. Binance Holdings kelishuvning bir qismi sifatida 4,3 milliard dollar jarima to‘lashga rozi bo‘ldi.

Ronaldu va kriptovalyuta almashinuvi Binance 2022 yilning yozida NFT maydonida hamkor bo‘lgandi.