Криштиану Роналду Флорида округ судида жамоавий даъвога учради.
Сабаби "Ан-Наср" ҳужумчиси Binance криптовалюта биржасини реклама қилган.
Coin Telegraph нашрининг ёзишича, 27 ноябрь куни Флорида штатидаги АҚШ округ судига берилган даъвода Роналду "Binance билан келишилган ҳолда рўйхатдан ўтмаган қимматли қоғозларни таклиф қилиш ва сотишда рағбатлантиргани, ёрдам бергани ва/ёки фаол иштирок этгани" айтилган.
Таъкидланишича, платформа рўйхатдан ўтмаган қимматли қоғозларга, шу жумладан Binanceдаги BNBга сармоя киритиш учун бир қатор Роналдо NFT-токенларини сотиб олган фойдаланувчиларни жалб қилган.
Шунингдек, даъво аризасида қайд этилишича, Роналду "Binance рўйхатдан ўтмаган криптовалюта қимматли қоғозлари билан савдо қилаётганини билиши керак эди, чунки у ташқи маслаҳатчиларни жалб қилиш учун сармоявий тажриба ва катта ресурсларга эга эди".
Даъвогарлар зарарни қоплаш ва суд харажатларини қоплаш учун маблағ талаб қилмоқда.
Аввалроқ Binance пул ювишга қарши кураш қоидаларига риоя қилмаслик ва санкцияларни бузганликда айбини тан олди ва АҚШ расмийлари билан келишув битимига эришди. Binance Holdings келишувнинг бир қисми сифатида 4,3 миллиард доллар жарима тўлашга рози бўлди.
Роналду ва криптовалюта алмашинуви Binance 2022 йилнинг ёзида NFT майдонида ҳамкор бўлганди.
