«Roma» bosh murabbiyi Joze Mourinyo Yevropa ligasi guruh bosqichi 5-turi doirasida bo‘lib o‘tgan «Servett» klubi qarshi o‘yindan (1:1) keyin yo‘qotilgan ochko uchun futbolchilarni jazolamasligini aytib o‘tdi.

«Hech kim jazoga tortilmaydi. Gvardiola o‘ziga yoqmagan futbolchilarni haydab yuborib, o‘rniga boshqa o‘yinchini tanlashi mumkin. Men esa bunday qilolmayman. Men har kuni mashg‘ulotda futbolchilarga ko‘p yuklama berib, ularning imkoniyatidan maksimum foydalanishga harakat qilaman.

Bizda ba’zi o‘yinchilar borki, ular mas’uliyatni o‘z zimmasiga olishni istashmaydi, yanada ko‘proq o‘ynash niyati borligini menga isbotlashga urinmaydi.

Agar ular menga ko‘proq o‘yin amaliyotini so‘rasa, men ularga: «Ko‘p o‘yin deganda sen nimani nazarda tutyapsan? Boshqa o‘yinchilar o‘lgan taqdirda, sen o‘ynaysan», deb aytaman. Chunki, jamoani oldinga tortish kerak bo‘lganda, bu ishni faqat ma’lum futbolchilargina qiladi», — dedi Mourinyo.