Krishtianu Ronaldu Osiyo chempionlar ligasidagi navbatdagi o‘yinni o‘tkazib yuboradi.

Osiyo chempionlar ligasi guruh bosqichining 6-turida “An-Nasr” – “Istiqlol” uchrashuvi bo‘lib o‘tadi. Uchrashuv Tojikistonda ertaga, 5 dekabr kuni bo‘lib o‘tadi va Toshkent vaqti bilan soat 21:00da boshlanadi.

Ronaldu ushbu o‘yinda jamoasining qaydnomasiga kiritilmadi va Dushanbega uchib ketmadi. “Varzish” telekanali xabariga ko‘ra, portugaliyalik futbolchi “Persepolis” bilan o‘yinda (0:0) olgan jarohatidan to‘liq forig‘ bo‘lmagan va shu sababli Saudiya klubi rahbariyati futbolchiga dam olish uchun vaqt bergan.

“An-Nasr” 5 turdan keyin 13 ochko jamg‘arib, Osiyo chempionlar ligasining pley-off bosqichiga yo‘llanmani kafolatlab bo‘lgandi. “Istiqlol” 2 ochko bilan guruhda so‘nggi o‘rinni egallab turibdi.